Hmâ a kong măng hâi môi rêm măng tĭng, lâm hriâm ăm mâu ngế ki ôh ti ‘nâi chư a pơlê Kret Krot, cheăm Hrá, tơring ‘Mang Yang mê hlo eăng trâ dêi mâu pul on, idrâp pơchuât dêi mâu ngế ki hriâm. Lâm hriâm kố ai 40 ngế, ing vâi hdrêng troh mâu vâi pâ, vâi nôu cho mơngế Bơhnéa dêi pơlê Kret Krot.

Klêi kơ’nâi pêi cheăng tơbrêi, nâ Sen, 45 hơnăm, hiăng troh a lâm tro chôu hnê vâ hriâm chêh chư. Môi tiah hên mâu nâ o ki ê, nâ Sen rĕng xo kơnốu, rơpŏng xơpá, ôh tá châ hriâm tâp. Nôkố lâm hnê chư ăm mâu ngế ki ôh ti ‘nâi chư châ po, nâ khŏm vâ hriâm xua ngăn kố cho rôh ki vâ pơxúa ăm dêi tơná.

“Á ôh ti ‘nâi chư, rơhêng vâ hriâm vâ ‘nâi chư vâ ‘nâi chêh inâi dêi tơná, drêng lăm ukố umê mê ‘nâi chêh inâi dêi tơná”.

Xuân môi tiah mê, nâ Mah, 29 hơnăm, ngế ki rơtế tung pơlê xuân troh a lâm hriâm klêi kơ’nâi môi hâi pêi cheăng chiâk deăng. Kơpeăng kŏng kơtô dêi môi ngế bu ‘nâi to tơdroăng ki râng ‘nêk, pôu pong, mê nôkố lăm hriâm tơrêm to chư, kơxô̆. Maluâ xơpá, nâ Mah khŏm hriâm chư xua loi tiah kố tơdroăng ki ‘nâi chư kô kum hên ăm nâ, ƀă rơpŏng hngêi.

“Á rơhêng vâ hriâm vâ nâi chư vâ xo ah hmôi lăm u lâi ‘lo, á ‘nâi chư xuân tơ’lêi hlâu tâ. Tâng môi tiah nôkố ôh ti ‘nâi chư lăm u lâi vâi xuân hôu, môi tiah hâi hdrối lăm hngêi pơkeăng djâ dêi kuăn pơlât tamo vâi thế chêh inâi mê ôh ti ‘nâi mê ƀok thái pơkeăng hôu xâu khât. Nôkố bu rơhêng vâ hriâm vâ ‘nâi chư vâ xo ah hmôi lăm u lâi ‘lo xuân hiăng tơ’lêi tâ”.

Trâm mâu vâi pú a cheăm pơlê, Trung ŭi Lê Tuấn Thành – kăn ƀô̆ Kŏng an cheăm Hrá, tơring ‘Mang Yang, kong pơlê Gia Lai hlê nhên dêi tơdroăng ôh ti ‘nâi dêi vâi krâ nhŏng. Ôh ti ‘nâi mê vâi krâ nhŏng o trâm hên xơpá drêng chêh pro mâu hlá mơ-éa a cheăm. Xua mê, châ tơdroăng ki ăm phêp dêi râ kơpêng, kăn pơkuâ Đảng kăn pơkuâ cheăm, Trung ŭi Thành ôh ti xê thái mê chiâng pro thái hnê vâ kum mâu rơpŏng kuăn pơlê ‘nâi chư, ‘nâi riân, ing mê rế hía rế hơ’lêh túa tơmiât, túa pêi tung mơnhông mơdêk cheăng kâ.

“Apoăng ối xơpá cho xua vâi krâ nhŏng o ối kơmêi, kơxiâp lim tung tơdroăng ki lăm hriâm chư. Vâi krâ nhŏng o cho mơngế Bơhnéa mê tơdroăng ki tơpui tơno ƀă vâi krâ nhŏng o ối xơpá môi iâ cho ‘na nâl tơpui, hlo tơviah xua tá hâi hlo tơdroăng ki kal. Vâ rak vế lâm hriâm ton khế hơnăm mê tơdjêp ƀă khu pơkuâ tơdroăng kal kí, mâu ngế pơkuâ pơlê, kŏng an thôn, tơrŭm ƀă tơdroăng hriâm ƀă hriâm rơkê kô ai mâu tơmeăm hbru ăm mâu ngế ki hriâm”.

Cheăm H’ra, tơring ‘Mang Yang, kong pơlê Gia Lai ai 9 to thôn, pơlê, kơxô̆ ngế hdroâng kuăn ngo châ troh 2/3, ki hên cho mơngế Bơhnéa. Pôa Dung, Kăn phŏ hnê ngăn Vi ƀan cheăm Hrá ăm ‘nâi, tơdroăng ki thái hnê chư Lê Tuấn Thành rế hnê chư chêh rế tŏng kum tơdroăng ki ê, hnê tối ƀă mơhnhôk kuăn pơlê, kum Kŏng an cheăm pơlê tơrŭm tro tâ ƀă khu mô đô̆i ƀă kuăn pơlê, pêi pro tro hnoăng cheăng hnê mơhnhôk.

“Hriâm chư vâi krâ nhŏng o hlê plĕng tâ, drêng pin lăm hnê tối mê xuân tơ’lêi hlâu tâ, xo ah hmôi vâi krâ nhŏng o pêi cheăng kâ kô tơ’lêi hlâu tâ, pêi chiâk pêi deăng, roê phon rơvât, pơkeăng vâ xúa tung pêi chiâk deăng, mơnhông cheăng kâ. Khu kăn pơkuâ cheăm tơkŭm tơbleăng khu lêng ƀă kuăn pơlê môi tiah hnê tối ‘na tơdroăng ki xo on veăng tá hâi tro hơnăm, xo ŏng mế ối môi mơheăm chhá mê vâi krâ nhŏng o tơ’lêi hlê nhên tâ ‘na tơdroăng mê vâ kơdroh tơdroăng ki ôh pá tro. Rơhêng vâ lâm hriâm kố châ po a pơlê Kret Krot mê xo ah hmôi kô po rơdâ troh a mâu pơlê ki ê nếo”.