Klêi leh tơdah, péa Ngế pro xiâm hnê ngăn tơnêi têa hiăng tơpui tơno, môi tuăn mơdêk tâi tâng tơrŭm cheăng pơla péa pâ. Pôa Phạm Minh Chính, Ngế pro xiâm hnê ngăn tơnêi têa tối rơdêi: Roh lăm pôu pêi cheăng djâ ki kơnâ pêi cheăng ton xŏn, po troăng tơmiât pêi la ngiâ ăm tơrŭm cheăng Khu tơrŭm cheăng ton xŏn tâi tâng Việt Nam – Malaysia.

Péa pâ châ pơkâ mơdêk pêi lo liăn tê mơdró  tâk 18 rơtal dollars tung to lâi hơnăm la ngiâ, tơdrêng amê mơdêk tơrŭm tung mâu kơvâ cheăng nếo môi tiah cheăng kâ xúa kŏng ngê̆, cheăng kâ krúa lĕm kong prâi, pơhlêh xúa on tơhrik, pơhlêh nếo tung tơmiât pêi rơkê, pêi chiâk deăng rơkê, gâk kring tơniăn troăng măng...

Péa pâ xuân tơkêa thăm tơdjêp tơdroăng ôm hyô, trâm mâ pơla kuăn pơlê, ki má lối cho vâi hdrêng, po rơdâ tơrŭm hnê hriâm, hnê mơjiâng, kum ăm dêi pó hnoăng liăn hriâm rơkê, ing mê thăm hlê plĕng ƀă tơrŭm pơla péa hdroâng mơngế.