Tung tơdroăng pêi pro, Thươ̆ng tươ̆ng Võ Minh Lương, Ngế xiâm phŏ Khu xiâm pơkuâ lêng hiăng teăng mâ mâu tíu cheăng dêi Khu xiâm pơkuâ lêng diâp lối 15.000 kơxuô tơmeăm ƀă tâi tâng kơnâ lối 10 rơtal liăn ăm mâu rơpŏng kăn ƀô̆, mâu lêng, mơngế pêi cheăng ai tơdroăng rêh ối pá puât tung Ƀinh đoân 15 ƀă kuăn pơlê, krâ pơlê, kăn pơkuâ thôn, ngế ki kuăn pơlê loi tơngah tung pơlê pơla hdroâng kuăn ngo a kơpong tơkăng kong dêi péa kong pơlê Gia Lai, Kon Tum.

Pakĭng mê, tơdroăng pêi pro ối ai mâu tơdroăng tơ’noăng kơxuô ‘’Kơƀăn chưng ngiât’’, trâm mâ tơpui tơno khôi túa lĕm tro, hơdruê xuăng, mơđah tơbleăng tơmeăm “0 liăn” tê ăm mâu tơmeăm ki kal xúa rêm hâi diâp ăm kuăn pơlê tung kong pơlê. “Têt tơkŭm dêi pó, rơnó Hơngui tŏng kum dêi pó’’ cho tơdroăng pêi châ Khu pơkuâ Kŏng đoân cheăng lêng ƀă Ƀinh đoân 15 tơkŭm po rêm hơnăm, vâ thăm krá tơniăn tuăn pâ rŭm môi tuăn, “tŏng kum pâ dêi pó” ƀă veăng rơtế khu râ kăn pơkuâ mâu kong pơlê kơpong tơkăng kong peăng kơnhŏng Tây Nguyên rak ngăn, tŏng kum kuăn pơlê tơdah Têt tŭm, hơtô.