Kơxo hâi lơ 11/4, Vi ƀan pơkuâ Kuô̆k hô̆i veăng hnê tối a hlá mơ-éa tơbleăng tối tơdroăng pêi pro séa ngăn “Tơdroăng mơhnhôk, rak ngăn ƀă xúa mâu tơmeăm vâ pêi tơdroăng hbrâ mơdât COVID-19; tơdroăng pêi pro tiô luât pơkâ tŏng kum, luât pơkeăng pơlât a cheăm, ‘na hbrâ mơdât pơreăng”. Tối tơbleăng dêi khu kăn séa ngăn ăm hlo, tâi tâng xiâm tơmeăm pêi tung tơdroăng hbrâ mơdât pơreăng COVID-19 kơpêng 236 rơpâu rơtal liăn. Tung mê liăn ngân tơnêi têa kơpêng 189 rơpâu rơtal liăn, tăng mơhnhôk tŏng kum, kơjo kum kơpêng 47 rơpâu rơtal liăn.

Hiăng ai rơtuh ngế pleăng hnoăng cheăng, malối cho mâu kăn ƀô̆ ngăn pơkeăng, mâu lêng veăng pêi hnoăng cheăng hbrâ mơdât pơreăng. Mâu khu râ kuăn pơlê mâu khu mơdró, mâu khu tơrŭm cheăng lâp plâi tơnêi veăng ‘no hnoăng cheăng, veăng tơlo liăn, tơmeăm.

Pôa Vương Đình Huệ, Kăn xiâm hnê ngăn Kuô̆k hô̆i pơkâ thế khu kăn séa ngăn tối tơbleăng nhên tơdroăng vâ xo liăn tung mâu kơxô̆ liăn tung tơnêi têa ƀă kong têa ê, chêh tối nhên ối to lâi hiăng châ  xo, ki lâi hâi châ ăm, lŭp to lâi, pro xôi to lâi? kơxô̆ vaccine rơlối, luâ hâi khế chiâng xúa to lâi.