Kơxo lơ 19/5, Khu pơkuâ hnê ngăn Đảng Kon Tum po Rôh hôp mơgêi 10 hơnăm pêi pro Hnê mơhno kơxô̆ 05 dêi Khu xiâm pơkuâ tơdroăng kal kí hneăng XII “ ‘Na mơdêk rơdêi hriâm tâp, pêi tiô tuăn tơmiât, túa rêh ối Hồ Chí Minh”. Luâ 10 hơnăm tơbleăng, kong pơlê hiăng pơhlêh tơdroăng cheăng tro ƀă tơdroăng pêi pro ki ai khât, hnoăng cheăng tơrêm hneăng. Rêm râ, kơvâ cheăng hiăng mơjiâng pro 2.760 túa pêi ki tro ‘ló, túa pêi ki tơƀrê, tơdjâk trâu rơdâ tơdroăng hriâm ƀă pêi tiô troăng lĕm Pôa tung khu tơrŭm Đảng ƀă kuăn pơlê.

A rôh hôp, khu pơkuâ hnê ngăn Đảng Kon Tum khĕn kơdeăn, diâp kơthô khê̆n kơdeăn dêi Kăn pơkuâ hnê ngăn Đảng ƀă ƀâng khĕn kơdeăn dêi Kăn hnê ngăn Vi ƀan kong pơlê ăm 30 khu pú hên, 46 ngế krê kơhnâ rơkê. Kố cho roh vâ tung lâp kong pơlê pơtối rối rơdêi hnoăng cheăng, ki pơxúa tơƀrê dêi tơdroăng hriâm tâp ƀă pêi tiô pôa tung hnoăng cheăng mơjiâng Đảng ƀă mơnhông kong pơlê.

*Xuân tung kơxo lơ 19/5, Khu pơkuâ tơdroăng cheăng Đoân Droh rơtăm kong pơlê Lâm Đồng tơkŭm po Hneăng hôp mơgêi 10 hơnăm pêi pro Pơkâ kơxô̆ 05 dêi Khu xiâm kal kí hneăng má XII, tơdrêng amê kheăn kơdeăn droh rơtăm rơkê pêi tiô rơkong Pôa Hồ hơnăm 2025. Mâu hơnăm hiăng hluâ, lâp kong pơlê Lâm Đồng hiăng pêi pro châ tơƀrê hên tơmeăm droh rơtăm mâu râ ƀă tâi tâng kơnâ lối 75 rơtal liăn; tung mê ai 45 tơmeăm râ kong pơlê, 446 tơmeăm râ tơring ƀă lối 8.400 tơmeăm, xing xoăng tơdroăng cheăng a râ cheăm.

Lâm Đồng ối rak 160 troăng pêi kâu lăk ƀô̆, khu rak vế kong prâi, mơhnhôk lối 4.000 đoân viên, droh rơtăm veăng. Tung mê, Khu pơkuâ Đoân hiăng kheăn kơdeăn 380 khu pú hên, ngế krê ki kơhnâ rơkê ƀă tơ’mot lối 5.800 đoân viên ki kơhnâ rơkê mot Đảng Kŏng san Việt Nam.

*Kơxo lơ 19/5, Vi ƀan hnê ngăn kong pơlê Dak Nông po Leh tơbleăng “Têt pêt loăng plâ rơxông pâ Pôa Hồ” ƀă tơbleăng túa pơkâ pêt loăng hơnăm 2025. A rôh leh, kăn pơkuâ kong pơlê krếo tâi tâng kơ koan, tíu pêi cheăng, tơring cheăm ƀă kuăn pơlê kơhnâ veăng pêi tiô rơkong Pôa hnê: “Xua ki pơxúa môi chât hơnăm pêt loăng, xua pơxúa hrĭng hơnăm hnê mơngế”. Klêi leh tơbleăng, mâu kăn hiăng pêt 1.300 xiâm loăng hngó 3 kơtâ hlá a kơpong pơkâ pêt loăng ngiât ối tung tơdroăng tơkêa pro hngêi trăng kih thuât Dak Nút, pơlê kong kơdrâm Gia Nghĩa.

Rơtế tung rôh ki mê, mâu tơring cheăm tung lâp kong pơlê xuân tơkŭm po hên hĭn leh tơbleăng ƀă lo pêt loăng. Hơnăm kố, kong pơlê Dak Nông pơkâ pêt lối 1.700 ha kong.