Cho teăng mâ ki má môi dêi kong pơlê Dak Lak châ pơ eăng a hâi leh khĕn kơdeăn hok tro, sinh viên, droh rơtăm kuăn ngo ki rơkê rôh má 10, hơnăm 2023, o Đoàn Gia Hân, kuăn ngo Tày, hriâm lâm 12 Chuyên sinh, Hngêi trung râ má pái Chuyên Nguyễn Du ai điêm hên. O hiăng châ kâ mâu pri mê cho: Pri ối má Môi râ kong pơlê ƀă má Péa râ tơnêi têa rôh tơ’noăng Olympic nâl Ănglê hok tro - sinh viên hơnăm 2022; cho ‘’Hok tro 3 tơdroăng ki lĕm’’ râ xiâm tơnêi têa; tung khu ki rah Hok tro rơkê râ tơnêi têa môn sinh học.

Ôh tá xê to hriâm rơkê, Gia Hân ối veăng pêi hên tơdroăng cheăng pa kong, tơdroăng ‘na pơlê pơla xuân môi tiah tơdroăng cheăng Đoân, Đội. O cho ngế cheăng tung Vi ƀan pơkuâ Đoân Droh rơtăm hngêi trung, ngế cheăng tung Khu pơkuâ kâu lạc ƀô̆ Nâl Ănglê râ kong pơlê. Đoàn Gia Hân tối: O mơ-eăm mơdoh hâi chôu tơdâng ƀă tơtro vâ veăng pêi mâu tơdroăng cheăng. Pakĭng mê ôh tá la lâi pơtê  tơdroăng ki mơ-eăm hriâm vâ rế hlê.

“O vâ pơtối mơ-eăm rak vế tơná xuân môi tiah mơ-eăm hriâm vâ pôi tá ai điêm iâ vâ châ điêm hên vâ tơmiât mâu tơdroăng vâ pêi pro tung la ngiâ ăm tơtro tâ. Tung la ngiâ ƀă môn Chuyên cho sinh học  mê a vâ chiâng môi ngế cheăng khoa hok, tăng ‘nâi plĕng ‘na kŏng ngê̆ sinh học xuân môi tiah kih thuât y sinh ƀă vâ rế hlê ‘na mâu kih thuât ki ó tâ, vâ rơkê, lĕm tiô túa nếo tung tơdroăng pơlât vâ kum ăm rêm ngế”.

Ƀă Y Un Diễm, nôkố dế hriâm hơnăm má 3 lâm Sư Phạm Nâl Ănglê hngêi trung Đại học Tây Nguyên, púi vâ châ hriâm a hngêi trung o hiăng kơdôu mơ-eăm tơkâ luâ tŭm tơdroăng pá, pơloăng mơnúa. Vâ châ vêh hriâm a hngêi trung pơtối tơdroăng púi vâ kơ’nâi 3 hơnăm pơtê, o kơdrâi kuăn ngo Triêng hiăng mơ-eăm hriâm ƀă veăng pêi mâu tơdroăng cheăng, chiâng “Sinh viên 5 tơdroăng ki lĕm tro’’ râ kong pơlê ƀă cho ngế pơkuâ tung Chi hô̆i hnê djâ chi hô̆i, châ pơxá “Pú hên sinh viên 5 tơdroăng ki lĕm’’ râ xiâm tơnêi têa. O xuân veăng pêi hên tơdroăng cheăng mê cho pơkuâ kâu Lak ƀô̆ sinh viên 5 tơdroăng ki tro dêi râ hngêi trung, Ngế cheăng tung mâu kăn ngăn Khu sinh viên Việt Nam kong pơlê Dak Lak. Hlối lăm hriâm, hlối lăm pêi cheăng tơ’nôm pro cô hnê ƀă veăng kum hnê a hngêi trung, Diễm ai tơ’nôm tơdroăng cheăng, pê lo liăn vâ xúa tung rêh kâ ối. Pakĭng mê, o xuân ti tăng ngăn môi tơdroăng tơkêa krê ƀă tơmiât kô pêi a pơlê dêi tơná tung la ngiâ ah ôh tá ton xếo. Y Un Diễm tối:

“Á ai tơdroăng tơkêa bro cho ‘’djâ nâl Ănglê troh a pơlê”. Ƀă mâu pú cho kuăn ngo môi tiah a ki ối a pơlê a hlo xơpá ‘nâng ƀă pá vâ châ hriâm nâl Ănglê. Mê drêng hiăng klêi hriâm, lo ing hngêi trung klêi mê a púi vâ a châ vêh a pơlê xiâm tơná vêh kum hnê ăm vâi pú ki mê vâ mâu vâi pú xuân ai rôh châ hriâm hlê nâl Ănglê, châ prôk troh a mâu kơpong tơnêi ki nếo ƀă hnê ăm vâi pú, vâ mâu vâi pú ai tuăn chân krá, ai rôh châ hriâm môi tiah á’’.

Dak Lak nôkố ai lối 170 rơpâu ngế hok tro, sinh viên kuăn ngo ki dế hriâm a mâu râ phôh thong ƀă Cao đẳng, đại học. Rơté ƀă mâu hok tro sinh viên, tung pơla hdrối kố nah, kong pơlê Dak Lak hiăng ai hên luât pơkâ, vâ tŏng kum, mơhnhôk hok tro sinh viên mơ-eăm mơnhông, pro tơ’lêi hlâu ƀă cho xiâm vâ mâu vâi o hmiân tuăn hriâm. O H’Hương Hoa Êban, sinh viên khoa Sư phạm Nâl Ănglê, hngêi trung Đại học Tây Nguyên tối ăm ‘nâi:

“Tung pơla hriâm á đi đo châ veăng kum ing mâu luât pơkâ dêi Đảng ƀă Tơnêi têa mê a hlo tơná kô tơmâng khât tâ a tơdroăng hriâm xuân môi tiah hriâm pât. Pakĭng mê, xuân pơxiâm ing  tơdroăng hâk tơngăm púi rơhêng pleăng tâi hnoăng cheăng dêi tơná ăm pơlê pơla tối tơdjuôm xuân môi tiah kuăn pơlê kuăn ngo tơná tối krê, á xuân vâ hriâm hên tâ mâu túa cheăng, tơdroăng ki tơkêa vâ pleăng hnoăng tơná  ăm kuăn pơlê’’.

Tơdrêng ƀă luât pơkâ dêi Đảng - Tơnêi têa, ƀă hnoăng cheăng cho teăng mâ ƀă kring vế hnoăng ki pơxúa dêi sinh viên, khu sinh viên Việt Nam kong pơlê Dak Lak ối tơmâng tơbleăng tơdroăng mơdêk hlê plĕng Nâl Ănglê ƀă hnê tơrŭm ƀă lâp plâi tơnêi ăm mâu sinh viên; mơjiâng tơdroăng Tơkêa bro rơtế ƀă, kum ƀă mơnhông hlê plĕng ăm mâu sinh viên kuăn ngo. Nâ H’Giang Niê, Ngế pơkuâ ngăn Đoân Droh rơtăm kong pơlê, Kăn hnê ngăn Khu sinh viên hdroâng kuăn ngo Việt Nam kong pơlê Dak Lak ăm ‘nâi: mâu sinh viên kuăn ngo ki rơkê kô cho mâu ngế ki mơhno troăng bâ eăng tơdroăng púi vâ pleăng hnoăng, mơnhông ăm rơxông ối nếo, mâlối ƀă mâu honăm ối nếo a pơlê.

“Ngin vâ tiah kố mâu vâi o kô mơhno hnoăng pêi pro tơná tung tơdroăng cheăng tơdjuôm dêi Đoân Droh rơtăm, Khu pơtối rak vế tơdroăng ki xiâm cho hok tro, sinh viên, droh rơtăm mơngế kuăn ngo tung tơdroăng rak vế, pơtối rak túa lĕm tro kuăn ngo, veăng pơ’lêh kơxô̆. Ngin tơngah khu kố kô pơtối rak vế ƀă kô rơtế ƀă khu pơkuâ ngăn Đoân Droh rơtăm kong pơlê, Khu sinh viên pêi pro tro mâu pơkâ’’.

-Ƀă mâu luât pơkâ rơtế ƀă, veăng kum, hên hok tro, sinh viên mâu kuăn ngo a kong pơlê Dak Lak hiăng khên, tơnôu tâ tung mâu tơdroăng cheăng pêi tơdroăng mơhnhôk pêi pro. Mâu vâi o xuân kơhnâ hriâm vâ hbrâ ăm tơná hlê hên mâu tơdroăng vâ pêi pro tung la ngiâ púi vâ pleăng hnoăng ki rơkê tơná ăm nhŏng o pơlê pơla.