Drêng troh apoăng hơnăm, rơnó Hơngui troh, kơxê lơ 16/1, a pơlê kong kơdrâm Kon Tum, Khu pơkuâ Đảng kong pơlê Kon Tum tơkŭm po trâm mâ mâu ngế hriâm lâm kân mâu rơkê, văn ngê̆ sih, mâu ngế chêh hlá tơbeăng 2023. Tơbleăng ƀă mâu ngế hriâm lâm kân mâu rơkê, văn ngê̆ sih, mâu ngế chêh hlá tơbeăng, pôa A Pớt, kăn hnê ngăn Đảng kong pơlê Kon Tum tối nhên, hơnăm 2022, kong pơlê Kon Tum  trâm mâ ƀă hên tơdroăng xơpá, pơloăng mơnúa, la ƀă tơdroăng tơrŭm môi tuăn dêi rơpó, Đảng bộ, mâu kăn, mâu lêng ƀă mâu hdroâng kuăn ngo hiăng mơ-eăm pêi hên tơdroăng tơƀrê ki kal tung tơdroăng veăng ‘no hnoăng dêi ƀă mâu ngế rơkê, văn ngê̆ sih, mâu ngế chêh hlá tơbeăng.

Púi vâ mâu ƀă mâu ngế hriâm lâm kân mâu rơkê, văn ngê̆ sih, mâu ngế chêh hlá tơbeăng pơtối rơtế ƀă mơnhông mơdêk dêi kong pơlê, pôa A Pơt pơkâ thế rêm râ, kơvâ cheăng pơtối pro tơ’lêi hlâu vâ mâu ki rơkê, mâu văn ngê̆ sih, mâu ngế chêh hlá tơbeăng pêi cheăng. Pakĭng mê, tơmâng tơleăng mơnhên mau tơdroăng  tơtro tiô luât, tơxâng tơdjâk troh kơvâ cheăng dêi tơná pêi.