Môi khế klêi kơ’nâi túa pêi cheăng kăn pơkuâ cheăm nếo châ tơbleăng pêi, tơdroăng ki pêi cheăng a Tíu pêi cheăng cheăm ‘Mang Yang hlo tơ’lêi, rĕng. Kăn ƀô̆, kong chưk vâi tơdah xo, chêh pro hồ sơ, tiâ mơnhên mâu tơdroăng ki kơ-êng tá hâi hlê nhên ƀă hnê ăm kuăn pơlê chêh pro dêi hồ sơ. Pôa Võ Lê Xuân Thiện, Kăn hnê ngăn Vi ƀan cheăm ‘Mang Yang, ăm ‘nâi hồ sơ mơéa gá hên, la kăn ƀô̆ cheăm chêh pro teăm ƀă mơdrếo ăm tơniăn:

“Mâu hồ sơ gá hên, lối 1.000 hồ sơ. Mâu hồ sơ ki tơ’lêi châ chêh pro mơdrếo tro hâi pơkâ, kuăn pơlê phiu ro khât. Apoăng pơxiâm pêi cheăng mê rế pêi rế hriâm mâu túa ki vâ chêh pro há”.

Klêi kơ’nâi môi khế pêi túa pơkâ kăn pơkuâ péa râ, mâu Tíu pêi cheăng tơdjuôm a Gia Lai hiăng pêi cheăng tơniăn, tơ’lêi, rĕng. Khu kăn ƀô̆, kong chưk, viên chưk hiăng mơeăm, rĕng hmâ ƀă tơdroăng pêi cheăng nếo rơtế ƀă hên tơdroăng cheăng tâ tâng vâ pơchông ƀă hdrối nah.

Tiô tơbleăng a Cổng Dịch công tơnêi têa hâi lơ 1/8, kong pơlê Gia Lai nôkố ối má 3/34 to kong pơlê, pơlê kong kân ‘na Ƀô̆ chih kơxô̆ tung cheăng chêh pro, mơdrếo mâu mơéa ăm kuăn pơlê ƀă khu mơdró kâ ing tíu pêi cheăng tơdjuôm, ƀă 76,86 điêm. Pakĭng mê, kong pơlê ối má 6/34 ‘na kơxô̆ hồ sơ ki pro tơ’nôm ƀă châ tơdah xo, chêh pro, ƀă tâi tâng 128.246 hồ sơ, tung mê hồ sơ nâp ing troăng hyôh internet châ 76,9%. Pôa Lê Dũng Linh, ngế pơkuâ ƀơrô chêh pro mơéa ƀă Séa ngăn mâu mơéa, Ƀơrô cheăng Vi ƀan hnê ngăn kong pơlê Gia Lai ăm ‘nâi, tung la ngiâ ah, kong pơlê kô pơtối mơdêk rơdêi xúa tuăn ngoâ kuăn mơngế pro vâ gum kăn ƀô̆, mơdêk rơdêi hnê hriâm, hnê cheăng ƀă hên ki ê vâ mơnhông tai tâng ki tơƀrê cheăng kăn pơkuâ kong pơlê 2 râ:

“Ngin pơtối hnê ăm mâu ngế cheăng ‘na mâu túa ki chêh pro mâu tơdroăng cheăng mâu mơéa ki kal mê gá chiâng ai tơ’nôm hên hồ sơ, tro ƀă tơkŭm po tơpui tơno pơla râ kong pơlê ƀă khu râ vâ tŏng gum mâu tơdroăng xơpá, tơvâ. Klêi kơ’nâi hiăng hnê klêi, mê kong pơlê kô mơnhên tối ing péa ƀâng. Môi cho ‘no tơdrêng ing troăng internet ƀă dưh liê̆u a tíu mơno  tiah hmâ, péa cho tơkŭm pơtroh mâu khu ki lăm ngăn. Tung tơdroăng ki lăm ngăn mê, ngin kô pơtối hnê hriâm ăm vâ gum mâu kong pơlê ki tá hâi hlê nhên khât. Tơdroăng kố kô ton troh tâi hơnăm 2025. Tung hơnăm 2026 mơni kô athế ai tơdroăng ki rah ngăn mâu kăn ƀô̆ ki lâi rơkê cheăng”.

Troh nôkố, Gia Lai hiăng pêi pro klêi kơ koan pêi cheăng sap ing kong pơlê, troh cheăm. Tơdrêng amê hlối mơdêk rơdêi xoăng râ 1.060 hnoăng cheăng pơcháu ăm râ cheăm. Vi ƀan hnê ngăn kong pơlê hiăng ăm phêp mâu cheăm bêng ai tŭm tơdroăng, mơjiâng tíu pêi cheăng ai hên kơvâ cheăng tung mê cho: pơkuâ ngăn tơdroăng tơkêa ‘no liăn mơjiâng pro, chêl thiê̆n tơdroăng ki xo tơnêi, ai tơnêi, tíu ki kơdoăng mơ’no têa ƀă tŏng gum mâu kế tơmeăm kal ki ê.

Pôa Phạm Anh Tuấn, Kăn hnê ngăn Vi ƀan kong pơlê Gia Lai ăm ‘nâi, tung tơdroăng ki hiăng ‘nâi nhên mâu tơvâ tơvân mê, la ngiâ ah kong pơlê kô tŏng gum rêm to cheăm sap ing 1 – 3 rơtal liăn vâ pêi cheăng pro, ‘mêng rơnêu mâu tơmeăm xúa; pơkâ troăng tŏng gum ăm kăn ƀô̆ nếo châ pơtroh a tíu pêi cheăng, tro ƀă cheăng hnê pêi cheăng, hnê hriâm mâu tơdroăng cheăng; tơdrêng amê hlối séa ngăn túa pơkâ ăm kăn ƀô̆ sap ing kong pơlê vêh tŏng gum mâu cheăm, bêng ki ối xơpá, vâ tơniăn mâu tơdroăng cheăng, rơkê ƀă tơƀrê tung pơla pêi cheăng.

“’Na kăn pơkuâ péa râ mê ki xiâm cho tơkŭm gum kuăn pơlê ƀă khu mơdró kâ mê apoăng cho tíu pêi cheăng athế pêi cheăng rĕng, tơ’lêi, rơkê ƀă tơdroăng tơdah xo, mơdrếo mâu mơéa ăm kuăn pơlê a mơhno hiâm mơno ki hơniâp ro. Má péa cho athế đi đo ối achê ƀă kuăn pơlê ƀă khu mơdró kâ. Tâi tâng tơdroăng cheăng dêi kong pơlê ƀă mâu cheăm bêng athế pơhlêh túa pêi sap ing pơkuâ ngăn, séa ngăn chiâng tơdroăng cheăng ki pêi, gum, pơhlêh nếo, tơmiât pêi rơkê, xo kuăn pơlê ƀă khu mơdró kâ cho ngế ki xiâm, pro tơ’lêi hlâu ăm kuăn pơlê ƀă khu mơdró kâ”.

Maluâ ai hên tơvâ kal châ tŏng gum, hên tíu kal ‘mêng rơnêu, la tơdroăng apoăng ăm hlo tung tơdroăng cheăng dêi kăn pơkuâ râ cheăm a Gia Lai ăm hlo kong pơlê dế prôk tro troăng. Rơtế ƀă tơdroăng ki hbrâ rơnáu sap ing cheăm, bêng, tro ƀă hnoăng cheăng pôu râng tung pêi pro mâu tơdroăng cheăng ƀă rêm ngế krê, rêm tíu pêi cheăng, ối ai tơdroăng ki rơtế prôk, ối a chê dêi Vi ƀan hnê ngăn kong pơlê. Kơnôm mê, tơdroăng cheăng dêi mâu cheăm dế châ mơdêk tơƀrê rêm hâi, rế hía rế pơhlêh krá tơniăn tung pơkuâ ngăn kong pơlê.