A Kŏng ti tơlo liăn meăm Thép Asean ối tung Kơpong hngêi kơmăi kơmok Hòa Phú, mâu hngêi kơmăi kơmok hiăng pêi cheăng tâi ivá. Tiô jâ Lê Thị Tuyết Hạ, Kăn xiâm phŏ kŏng ti, dâng 600 ngế kŏng nhân hiăng mot pêi cheăng tung mâu hâi apoăng hơnăm. Kŏng ti xuân hiăng tơdah châ hên hlá đơn tơmeăm ing mâu khu ki rôe, pói vâ mâu tơdroăng pơxiâm pêi cheăng apoăng lĕm tro tung hơnăm 2024:

“Klêi kơ’nâi mơgêi hneăng pơtê hâi pơxiâm troh rơnó Hơngui pêi cheăng ƀă mâu khu ki lăm pêi tŭm, apoăng hơnăm mê Khu kăn xiâm pơkuâ xuân li xì liăn mơhnhôk rơkâu têt pơxiâm hơngui ăm tâi tâng nhŏng o. Khu râ kăn pơkuâ xuân pói vâ ăm kơchơ tê mơdró châ tơƀrê hôm, mâu tơmeăm ki mơjiâng pro châ hên peăng kŏng ti kô ai mơjiâng pro tê mơdró tơniăn vâ mơngế pêi cheăng ai cheăng pêi, pêi lo liăn tơniăn’’.

Xuân tung mâu hâi apoăng hơnăm Giáp Thìn, Kŏng ti pêi cheăng tiô rơnó pơchoh chêp hmân ếo Lực Thiêm a Kơpong Hngêi kơmăi kơmok Tân An 2 hiăng tơdah châ hên tơmeăm ki nếo. Pôa Trần Trí Vỹ, Kăn pơkuâ Kŏng ti tối ăm ‘nâi, 1.000 ngế kŏng nhân vêh pêi cheăng, tung mê, 95% cho mơngế hdroâng kuăn ngo ƀă 90% cho kơdrâi. Nôkố, Kŏng ti thâ rah xo tơ’nôm mâu ngế pêi cheăng ƀă po rơdâ tíu mơjiâng tơmeăm kơmăi kơmok vâ tơxâng mâu hlá đơn tơmeăm nếo:

“Khu tê mơdró hâi má 10 hiăng pơxiâm pêi cheăng, hâi pêi cheăng apoăng á lăm pêi cheăng mê tâi tâng kŏng nhân mot pêi cheăng châ 98%. Hơnăm kố đơn tơmeăm ngin tâk hên tâ hơnăm hdrối dâng 20%, tơdroăng ki kố mơjiâng ivá ăm khu tê mơdró kô mơnhông mơdêk rĕng tâ mê nếo. Nôkố, Kŏng ti dế rah xo mơngế pêi cheăng mơngế pêi cheăng a mâu kong pơlê hên, nôkố ai 1 rơpâu ngế kŏng nhân. Tung pái khế apoăng hơnăm kố, tíu cheăng kô rah xo tơ’nôm 300 ngế pêi cheăng nếo ăm tơtro ƀă đơn tơmeăm dêi á’’.

Tơdroăng ki phiu ro ing khu tê mơdró hiăng kum mâu kŏng nhân mơ-eăm hên tâ mê nếo drêng lăm pêi cheăng tung mâu hâi apoăng hơnăm nếo. Nâ H’Theo Triết ối a ƀuôn Jun, cheăm Yang Tao, tơring Lak, nôkố pro kŏng nhân a Kŏng ti pêi cheăng tiô rơnó pơchoh chêp hmân nếo Lực Thiêm tối ăm ‘nâi, ko mơ-eăm pêi dêi tơdroăng cheăng tơná vâ mơdêk pêi lo liăn:

“Sap ing á mot a kŏng ti tơdroăng rêh ối dêi á châ pơhlêh hên tâ ƀă ki pơxúa dêi Kŏng ti xuân hôm. Klêi têt á hlo rêm ngế phiu ro, sôk xua vâ pơtối pêi cheăng’’.

Tiô pôa Nguyễn Kim Tùng, Kăn pơkuâ Khu pơkuâ Kơpong hngêi kơmăi kơmok Tân An, nôkố Kơpong hngêi kơmăi kơmok ai 73 khu tê mơdró dế pêi cheăng, kơlo têk tơbêng châ 100%. Mâu hâi apoăng hơnăm 2024 tơdroăng pêi cheăng a hngêi tíu mơjiâng pro tơmeăm kơdrâm phiu ro, kơdrâm kơdrĕng mơngế ƀă khŏm mơ-eăm mơdêk pêi lo tơmeăm, mơdêk ki dâi lĕm tơmeăm.

“Troh nôkố cho 100% khu tê mơdró cho pơxiâm hơngui ƀă kơxô̆ kŏng nhân hdrối Têt, kơ’nâi Têt ôh tá pơhlêh hên ƀă pơkâ pêi tiô tro tối hdrối mê troh pái khế apoăng hơnăm ƀă pái khế pơtối hơnăm tâk tơ’nôm 2 rơpâu ngế. Apoăng hơnăm hlo tung kơpong hngêi kơmăi kăn ƀô̆, nhân viên ƀă kŏng nhân tâi ivá pêi cheăng. xuân pói vâ tung hơnăm 2024 tơdroăng cheăng kâ ôh tá pá puât xếo ƀă rêm ngế hâk vâ pêi cheăng ƀă djâ tơdroăng ki pơxúa ƀă tơdroăng rêh ối lĕm ăm kuăn pơlê a kố hên tâ mê nếo’’.

Rơnó Hơngui 2024 ƀă mâu tơdroăng ki phiu ro ƀă khu tê mơdró, ngế pêi cheăng a Dak Lak djâ troh tơdroăng loi tơngah, pói vâ ‘na mâu tơdroăng châ tơƀrê nếo tung mơnhông cheăng kâ – rêh ối pơlê pơla, pơhlêh tơdroăng rêh ối kuăn pơlê.