Hơnăm 2023, Kŏng ti xiâm Tân Cảng Sài Gòn, khu mơdró kâ lêng dêi Khu lêng kring gak têa kơxĭ mơ-eăm tơrŭm ƀă Khu hnê mơhno cheăng Đảng 3 kong pơlê: Kon Tum, Gia Lai ƀă Dak Nông mơdêk hnê tối ‘na têa kơxĭ, chuăn rơlố tung rêm râ kuăn pơlê.

A mâu rôh hnê tối ăm lối 4.000 ngế tối tŭm tơdroăng ‘na têa kơxĭ, chuăn rơlố. Veăng pêi tơdroăng cheăng mơnê mâu hiăng ai hnoăng ƀă tơniăn tung rêh ối pơlê pơla, tíu pêi cheăng hiăng pro 15 toăng hngêi tuăn pâ; xo păn roăng rak ngăn 28 ngế Jâ Nôu Việt Nam khên tơnôu, nhŏng o mâu ngế ai hnoăng tơnêi têa; hbru tơmeăm ăm rơpŏng kơtiê, mâu ngế ai hnoăng ki kơtiê, mâu kơtiê tâi tâng kơxô̆ liăn lối 2 rơtal liăn.

Kĭ tơhrâ tơrŭm cheăng hơnăm 2024, Kŏng ti xiâm Tân Cảng Sài Gòn ƀă Khu hnê mơhnhôk cheăng kal kí dêi Đảng ủy 3 kong pơlê: Kon Tum, Gia Lai ƀă Dak Nông tối kô pơtối mơdêk tơdroăng hnê, mơdêk hlê plĕng dêi mâu kăn ƀô̆, đảng viên, hok tro, sinh viên ƀă rêm râ kuăn pơlê ‘na troăng rơhlâ, luât pơkâ dêi Đảng, Tơnêi têa ƀă tơdroăng ‘na têa kơxĭ, chuăn, rơlố, hên túa hnê tối ing tơdroăng ăm hlo troh tơrêm khu tơrŭm cheăng tơ’noăng, hneăng tơ’noăng tí tăng ‘nâi plĕng ‘na têa kơxĭ, chuăn, rơlố; mơdêk tơdroăng hnê mơhnhôk, tơniăn rêh ối tung mâu kong pơlê.