Tối tơbleăng a rôh mơgêi hneăng hôp, Kăn xiâm hnê ngăn Kuô̆k hô̆i Vương Đình Huệ pơkâ thế, Kuô̆k hô̆i pơtối rak vế ‘’mơjiâng luât tơtro, séa ngăn tơƀrê, pơkâ teăm tơdrêng, pêi cheăng mơnhông tơƀrê” vâ rơtế ƀă Chin phuh, mâu kơ koan tung khu cheăng kal kí pê klêi tơdroăng cheăng ki châ pơcháu, rêh ối pơlê pơla hơnăm 2024 ƀă pơla hơnăm 2021-2025, mơnhông tơnêi têa xông tơƀrê rĕng ƀă krá tơniăn.

Tơdroăng Kuô̆k hô̆i tơbleăng Luât Tơnêi (‘mâi hơ’lêh) hiăng pê klêi môi tung mâu tơdroăng cheăng ki kal má môi dêi hneăng Kuô̆k hô̆i hneăng má 15. Kuô̆k hô̆i xuân tơbleăng Pơkâ ‘na mâu luât ki phá krê xêh vâ pêi mâu tơdroăng pơkâ dêi tơnêi têa. Tiô Kăn xiâm hnê ngăn Kuô̆k hô̆i Vương Đình Huệ tối, kố cho tơdroăng pêi pơtối tơdroăng séa ngăn mâu kăn ‘na chuyên đề mê dêi Kuô̆k hô̆i a rôh hôp hdrối.

Kuô̆k hô̆i xuân ăm phêp xing xoăng, xúa vâ chê 64 rơpâu rơtal liăn ăm mâu tơdroăng cheăng pêi, tơdroăng tơkêa pro dêi 5 tơdroăng: mê cho cheăng lêng, kring tơniăn, rak ngăn tơnêi têa, khoa hok kơmăi kơmok ƀă troăng prôk, tung mê ai ‘măn vâ chê 58 rơpâu rơtal liăn ăm 32 tơdroăng pơkêa pro troăng prôk xiâm.