Xuân tung kơxê lơ 26/1, a kong pơlê Ninh Thuận, pôa Phạm Minh Chính, Ngế pro xiâm hnê ngăn tơnêi têa mơhnhôk thế lo lăm pêi pro tơdroăng tơkêa bro rơnêu ilĕm troăng kân Nha Trang – Sài Gòn, troăng rơxế lơtreng Hà Nội – pơlê kong kân Hồ Chí Minh. Xông tơpui a leh mơhnhôk, Ngế pro xiâm hnê ngăn tơnêi têa  mơnhên, mơ’no liăn mơjiâng pro troăng klông tối tơdjuôm ƀă kơvâ troăng rơxế lơtreng tối krê ôh tá xê to hnoăng cheăng dêi Khu xiâm pơkuâ troăng prôk ƀă rơxế kơtâu mê ối cho hnoăng cheăng kal kí má môi dêi mâu kong pơlê, mâu khu xiâm, kơvâ cheăng cho vâ pơxúa ăm mâu kong pơlê.

Tung la ngiâ, Chin phuh kô pơtối hnê mơhno vâ pêi rĕng kêi đeăng tơdroăng hbrâ mơ’no liăn mơjiâng pro troăng rơxế lơtreng ăm phêp kơtâu têi Kơnhŏng – Hdroh, mơ-eăm mơjiâng pro ối tung pơkâ pêi iâ hơnăm 2026 – 2030. Chin phuh kô đi đo tơmâng, hnê mơhno kơtăng vâ pêi kêi đeăng mâu tơdroăng tơkêa bro tro pơkâ, dâi lĕm; tơxâng tơdroăng kal vâ mơnhông mơdêk cheăng kâ – rêh ối pơlê pơla, mơdêk tơdroăng rêh ối dêi kuăn pơlê.