Hneăng lăm pôu sap hâi lơ 11 troh lơ 13/1/2024. Klêi leh tơdah kân krip, Kăn xiâm hnê ngăn tơnêi têa Võ Văn Thưởng ƀă Kăn xiâm pơkuâ kong têa Indonesia Joko Widodo pơkuâ djâ khu kăn xiâm péa tơnêi têa hôp tơpui tơno. Péa khu kăn vâ môi tuăn, ing mâu tơdroăng cheăng hiăng châ pêi tơƀrê kân vâ chê 70 hơnăm hdrối, kal rĕng djâ tơrŭm cheăng pơla péa tơnêi têa rế tâk hên.

Kăn xiâm hnê ngăn tơnêi têa Võ Văn Thưởng tối nhên Việt Nam đi đo nhoăm ƀă púi vâ mơdêk tâ nếo tơrŭm cheăng môi tiah hmâ sap ton nah ƀă kong têa Indonesia; rơkâu Indonesia tơkŭm po klêi hneăng tâ phĭu rah xo kăn xiâm la ngiâ, pơtối mơnhông tơƀrê, veăng ‘no hnoăng cheăng hơniâp  ƀă tơrŭm tơrôa a kơpong ƀă tung lâp plâi tơnêi.

Péa ngế kăn xiâm vâ môi tuăn mơdêk tơrŭm tâ nếo mâu luât pơkâ pơka péa pâ; rĕng mơjiâng Tơdroăng pêi pro pơla hơnăm 2024-2028 tơtro ƀă tơdroăng ki nếo. Péa ngế kăn xuân vâ môi tuăn ing mâu tơdroăng tơrŭm cheăng ki kân vâ chê 70 hơnăm hdrối, rĕng djâ tơrŭm cheăng pơla péa tơnêi têa rế xông tơƀrê tâ nếo.

Kăn xiâm pơkuâ kong têa Indonesia tung kơxo hâi lơ 12/1 hiăng ‘măn hơvĭng reăng, a Hngêi ‘măn poăng Kăn xiâm hnê ngăn tơnêi têa Hồ Chí Minh ƀă a Tíu meăn tơbâ chêh inâi mâu ngế hlâ tơplâ khên tơnôu ki ai hnoăng tơnêi têa.