Vâ mơhnhôk pêi khât mâu khu cheăng tơpâ mơdât on chếo, kong pơlê Dak Nông hiăng mơjiâng túa pêi cheăng “Khu lêng hbrâ mơdât on chếo ƀă tŏng xo mâu ngế xía vâ”. Leh tơbleăng dêi Khu kố châ tơkŭm po nếo a kơpong kong loăng hngó dêi cheăm Trường Xuân, tơring Dak Song.  Ing mê, Khu lêng hbrâ mơdât on chếo ƀă tŏng xo mâu ngế xía vâ cho mâu ngế tung khu lêng kŏng an ƀă khu ki rah xo ing mâu cheăm Trường Xuân, Nâm N’Jang (tơring Dak Song) ƀă bêng Quàng Thành (pơlê kong kơdrâm Gia Nghĩa).

Kố cho túa tơrŭm cheăng hbrâ mơdât on chếo ƀă tŏng xo mâu ki xía vâ ki apoăng tung kong pơlê Dak Nông, pêi hnoăng cheăng dêi mâu cheăm, tơring, kơjo kum veăng tơpâ mơdât on chếo, kế pơtôu a mâu tíu ki achê. Malối cho tơpâ on chếo kong, chếo chêk a mâu tíu ki rơ-iô, rơxế ôh tá troh vâ tơpâ.