Hâi lơ 5/8, Đảng ƀô̆ Quân đoân 34 tơkŭm po hneăng hôp roh má môi, hneăng hơnăm 2025 – 2030. Quân đoân 34 châ mơjiâng hơnăm 2024, ing tơdroăng ki tơmot chiâng môi Quân đoân 3 ƀă Quân đoân 4, pêi pro hnoăng cheăng xŏn ing Tây Nguyên troh Đông Nam Bộ. Tung pơla kố nah, Đảng ƀô̆ Quân đoân 34 hiăng rĕng kêi đeăng tâi tâng khu pêi cheăng, chôa ‘lâng mơnhên hnoăng cho tíu cheăng ki xiâm tung khu cheăng.

Mot a hneăng nếo, Đảng ƀô̆ Quân đoân 34 mơnhên tơkŭm peie pro pái tơdroăng mơnhông ton xŏn: mơdêk ivá ki dâi lĕm hnê pơtâp, hnê hriâm kal kí, pơkuâ troăng tơmiêt ƀă mơjiâng khôi túa lĕm Mô đô̆i Pôa Hồ tung rơxông nếo; mơdêk mơjiâng chính quy, krá tơdroăng kheăn hôu, tơkŭm po khu pêi cheăng ƀeăn ƀĕng, châ tơƀrê, ‘mâi pơhlêh pơkuâ tơnêi têa ƀă pơhlêh xúa kŏng ngê̆; tơdrêng amê, tơtrŏng mơdêk ivá pơkuâ, ivá tơplâ dêi khu pêi cheăng đảng a pơlê cheăm ƀă ki rơkê dêi mâu khu kăn ƀô̆, đảng viên. Xông tơpui a Hneăng hôp, Thươ̆ng tươ̆ng Võ Minh Lương, Phŏ Ngế xiâm Khu xiâm pơkuâ lêng, kheăn kơdeăn mâu tơdroăng châ tơƀrê dêi Đảng ƀô̆ Quân đoân 34 tung hneăng hiăng hluâ hiăng châ tơƀrê. Hdrối pơkâ nếo ‘na gâk kring Tơnêi têa ƀă mơjiâng Khu lêng tiô rơxông nếo, Phŏ Ngế xiâm pơkâ Quân đoân pơtối mơjiâng tíu pêi cheăng krá rơdêi; hbrâ hriăn plĕng, tơbleăng ƀă Khu xiâm pơkuâ lêng mâu troăng pêi tơtro ƀă troăng pêi cheăng khu râ kăn péa râ.