Dế prôk a troăng ki kŭn tung kơpong Kơdrum kong ilâng Tơnêi têa Yok Đôn, kơpong cheăm Krông Na, tơring Ƀuôn Đôn, kong pơlê Dak Lak, rui kăn H’Blŭ ngăn hlo kế kâ hlối hnĭng tối ăm mâu pú dêi tơná. Prôk pa rŏng rui H’Blŭ, rui kăn Khăm Phanh xuân rĕng lăm troh pa ngiâ kâ châu priât hiăng ai hlâu a mê. Hiăng klêi kâ, vâi lăm troh a kĭng têa long ôu têa, hum vâ ăm tơmối châ ngăn.

Mâu tơdroăng cheăng dêi 2 to rui kố pơrá môi tiah tơdroăng cheăng rêm hâi, ôh ti ai tơdroăng ki pơklât thế lơ pơkâ thế dêi ngế pơkuâ. Tơmối ki lăm hyô ngăn tâng ối hơngế vâ ăm tơniăn, séa ngăn tung pơla mâu prôk lăm, kâ kế ƀă hmâng tơdroăng ki tối tơbleăng dêi ngế ki tơbleăng ‘na tơdroăng ƀă hâi khế hnê pơtâp, rak ngăn dêi rêm to rui. Nâ Phan Ngọc Quế Lâm, tơmối ôm hyôu ối a pơlê krâm 11, pơlê kong kân Hồ Chí Minh tối:

“Môi tiah rui ối tung kong, mê vâi hlo tơniăn tâ mê tơná á xuân hlo tơniăn há drêng hlo mâu kơpong tơnêi tơníu môi tiah kố. Rui cho môi túa kuăn kiâ ki chiâng xêh ki chiâng ối tung kong mê hlo tơniăn tâ. Châ mâu ngế ki tối tơbleăng tối hên tơdroăng ‘na rui gá ro khât ƀă rơhêng vâ á châ ‘nâi tơ’nôm hên tâ ‘na rui”.

Tơdroăng ki lăm mơnúa lăm kố cho tuor ôm hyô kong kế nhâ loăng hmâ achê ƀă rui xua Kơdrum kong ilâng Tơnêi têa Yok Đôn ƀă Khu tơrŭm ngăn Kuăn kiâ kong châu Á tơrŭm pêi ing tơdế hơnăm 2018. Ƀă ki rơhêng vâ rak vế khu rui hngêi a Dak Lak hlo tơdroăng ki a khât kố mâu rui rế krâ, ôh tá lăm prôk hmâng vâ, ôh ti ai ivá. Nôkố, ai 10 khu rui veăng tung túa pơkâ, tung mê a 6 to rui kăn hmâ ối a chê ƀă tơmối. Tiô ngoh Phạm Xuân Quỳnh, kăn ƀô̆ ngăn tơdroăng tơkêa dêi Khu tơrŭm Kuăn kiâ kong châu Á, mâu rui ki veăng tung tơdroăng kố hiăng châ hmâ ối tung tơdroăng ki tơniăn hmâng vâ, hluăn ing tơdroăng ki tro kuăn mơngế kât chêng ƀă kơxái meăm.

Teăng ăm tơdroăng ki ‘nân a rŏng rui, tơmối châ ngăn rui ing hngế, ngăn rui kâ, ngăn rui ôu têa, ngăn rui hum, ngăn rui koi, rui xah hêi tung kong ƀă hên ki ê ki ôh tá tơdjâp troh rêh ối dêi vâi.

“Ngế ki ‘nân a rŏng rui ôh tá râng kơxái meăm, ôh tá râng mâu loăng ‘nhiú, bu râng tơmeăm diâp lơ ăm kâ vâ rui veăng pro. Á xúa mâu tơdroăng ki mê rế hía rế kum ăm rui vêh tơrŏng ƀă mâu tơdroăng ki hmâ dêi gá, gá kô ‘nâi gá kal athế tăng kế kâ a tíu lâi, chiâng pơlât xêh ăm dêi tơná gá tiah lâi, rak ngăn dêi rơpó tiah lâi. Hmâ túa tơmiât dêi rui gá tơniăn tâ mê ivá gá mo tâ. Kế kâ, têa ôu mê gá tro la mâu klâi ki gá kal.Ki pơxúa dêi rui châ mơdêk tâ”.

Tung 6 hơnăm hdrối Kơdrum kong iilâng Yok Đôn tơdah tơmối troh lăm hyô ngăn, châ mơnúa tung mâu tour ôm hyô kong kế nhâ loăng ki hmâ a chê ƀă rui. Hơnăm 2023, tour mơnúa ngăn kố châ tơkŭm po hên má môi Việt Nam tơbleăng cho môi tung 20 tour ki ro tơviah má môi Việt Nam.Ngoh Y Siêm Hđơk, ngế ki tơbleăng Kơdrum kong ilâng Tơnêi têa Yok Đôn tối tiah kố: Tơdroăng ki mơnhên kố ăm hlo túa pơkâ kố ôh ti xê bro pơxúa tơƀrê troh rui ƀă kong prâi tơnêi tơníu ki chiâng xêh mê ối châ tơmối hâk vâ khât.

“Tour ki châ mơnúa ngăn rui dế cho tour tơ’mot tơmối ôm hyô tung tơnêi têa ƀă kong têa ê hâk vâ má môi, pro pơxúa kơnía lĕm tro ăm mâu rui. Tung pơla mơnúa ngăn ruimê á kô tơbleăng mâu tơdroăng ăm tơmối ôm hyô rế hâk hâ tâ kơ mâu rui”.

Rơtế ƀă túa ôm hyô hmâ a chê ƀă rui, drêng tơmối troh a Kơdrum kong ilâng tơnêi têa Yok Đôn xuân chiâng vâ lăm ngăn mâu tơdroăng cheăng ki ê môi tiah: vo plong a kroăng Srêpôk, xế ká, pro hơkôp, ngăn ƀă xup um mâu chêm, prôk chêng tung kong, tăng ‘nâi kong kế nhâ loăng ilâng ƀă hên ki ê.

Pôa Vũ Đức Giỏi, Kăn phŏ pơkuâ Tíu xiâm hnê hriâm kong prâi tơnêi tơníu ƀă tê mơdró, Kơdrum kong ilâng Tơnêi têa Yok Đôn ăm ‘nâi, tíu pêi cheăng a hên mâu túa ki mơnúa ngăn xuân môi tiah mâu tơmeăm dế ai nôkố vâ tơ’mot tơmối ôm hyô.

“Kơdrum kố xuân hiăng klâ bro mâu tour ki lăm ngăn rui tơdế hâi lơ plâ hâi veăng mơnúa ngăn rơtế ƀă rui lơ mâu tour ôm hyô ki iâ hâi tâ vâ tro ƀă hâi chôu ƀă tơdroăng ai dêi tơná, tơdroăng rơhêng vâ dêi tơmối. Troh akố klêi kơ’nâi tơdroăng tơkêa ôm hyô hiăng klê, Kơdrum tơnêi têa Yok Đôn kô krếo thế mâu khu ki ‘no liăn mot tơrŭm mơdró, tơrŭm lơ mung tơnêi tơníu kong vâ vâi ‘no liăn tung mơnhông ôm hyô kong kế dêi kơdrum kong kố”.

Ai hên sinh hok, hên túa kuăn kiâ, tơmeăm ki kơnía git, Kơdrum kong ilâng Tơnêi têa Yok Đôn cho tíu ki ai kế kâ, têa ôu xuân môi tiah mâu tơnêi tơníu tơtro vâ khu rui hngêi a Dak Lak vâ hmâ vêh ƀă tơdroăng rêh ối tung kong. Ing mê, pro rôh tơ’lêi vâ vâ châ rak vế ton xŏn, ivá rơdêi ƀă tơniăn hmâng vâ tâ, tơdrêng amê xuân bro chiâng môi túa pơkâ ôm hyô ki hơniâp ro krê drêng tơmối troh a Dak Lak.