Kơxo lơ 12/1, pôa Phạm Minh Chính, Ngế pro xiâm hnê ngăn tơnêi têa ƀă Ngế pro xiâm hnê ngăn kong têa Lếo Sonexay Siphandone rơtế pơkuâ Hneăng hôp roh má 45 Vi ƀan tơrŭm Chin phuh ‘na tơrŭm pơla péa pâ Việt Nam – Lếo châ tơkŭm po a pơlê kong xiâm Viêng Chăn, kong têa Lếo. A roh hôp, péa pâ hiăng tơpui môi tuăn, pêi pro nhên mâu rơkong tơpui mơgêi dêi péa Khu xiâm kal kí tung Môi tuăn Pơkâ pêi tơrŭm cheăng pơla péa tơnêi têa hơnăm 2023 ƀă kô tơkŭm pêi pro kơtăng sap apoăng hơnăm vâ thăm mơnhông tơrŭm cheăng tung mâu kơvâ cheăng kal kí – tơpui kâ ƀă kong têa ê – gâk kring cheăng lêng, mơ’no liăn cheăng – tê mơdró.

‘Na pơkâ troăng prôk la ngiâ tơrŭm cheăng tung la ngiâ, péa pâ hiăng môi tuăn tơkŭm pêi pro tơtro mâu tơbleăng tơdjuôm, môi tuăn dêi péa Khu xiâm kal kí, môi tuăn péa Chin phuh ‘na troăng pêi ton xŏn tơrŭm 10 hơnăm hneăng hơnăm 2021 – 2030 ƀă Pơkâ tơrŭm cheăng hơnăm 2021 – 2025 ƀă mâu tơdroăng môi tuăn ki ê.

Péa pâ mơnhên khŏm mơ-eăm ƀă tối rơdêi pơkâ tŏng kum dêi pó mơjiâng tơdroăng cheăng kâ tơniăn krê, pơkuâ xêh ƀă mot tơrŭm lâp plâi tơnêi trâu hơngế ƀă châ tơƀrê.