Ngế pro xiâm hnê ngăn Phạm Minh Chính vêh mơnhên tối mâu tơdroăng ki hiăng châ chiâng pêi pro tung mâu tơdroăng ki mơjiâng mâu tơmeăm khoăng, troăng prôk, tơdroăng tơkêa bro ki kal dêi tơnêi têa, tơdroăng cheăng ki xiâm dêi kơvâ troăng prôk. Ngế pro xiâm hnê ngăn hâk kơdeăn kheăn mâu khu kăn ki ngăn ‘na mơ’no liăn cheăng, mâu khu râ, kơvâ cheăng hiăng môi tuăn, khŏm mơ-eăm pơkâ pêi pro mâu tơdroăng tơkêa pro vâ pêi pro tơniăn tơdroăng cheăng, tro ‘ló tiô tơdroăng ki hiăng thăm mơdêk mâu tơdroăng cheăng tơkêa bro.

Klêi mê, tơkŭm po văng tơnêi tíu, tơniăn ai tŭm mâu tơmeăm ki mơjiâng troăng prôk vâ pêi pro klêi tơdroăng cheăng tơkêa bro mê, Ngế pro xiâm hnê ngăn hiăng pơkâ thế mâu khu râ, kơvâ cheăng ki ai tơdjâk athế hbrâ pêi pro dêi xêh, tơrŭm cheăng ƀă dêi pó vâ tah lôi mâu tơdroăng ki tơvâ tơvân ki ai păng ‘nâng, ôh tá ví tiah kố tiah mê.

Xua mê, kal athế hbhrâ rơnáu pơkâ pêi pro mâu hnoăng cheăng hiăng châ pơcháu, athế tơtro ƀă hâi khế, thăm mơdêk ivá cheăng, hnoăng cheăng, rak tơniăn tro lĕm mơnâ mâ ngăn, kring vế tơniăn a troăng prôk.