Ngế pro xiâm hnê ngăn Chin phuh Phạm Minh Chính  tối nhên hneăng lăm pôu Australia dêi Khu kăn xiâm Việt Nam ai pơxúa kal khât, mơhno tơdroăng púi vâ rơtế ƀă Australia ‘mâi mơnhông ƀă rế trâu rơdâ tơrŭm cheăng  pơla péa tơnêi têa, xuân môi tiah mơdêk tơrŭm cheăng krá tâ pơla Kuô̆k hô̆i Việt Nam ƀă Kuô̆k hô̆i  Australia, veăng ‘no hnoăng po tơngâh tơrŭm cheăng ki nếo tung la ngiâ. Péa ngế kăn xiâm vâ môi tuăn tơrŭm krá tâ nếo tơpui kâ ƀă kuăn pơlê, tơrŭm cheăng  hbrâ ví hyôh kong prâi ôh tá tơniăn, po troăng tơƀai kơneăng tơdrêng vâ po rơdâ tơrŭm cheăng hnê hriâm ƀă hê mơjiâng tuăn ngôa rơkê, ôm hyô. Rôh kố, Ngế pro xiâm hnê ngăn Chin phuh Phạm Minh Chính púi vâ Kuô̆k hô̆i Australia pơtối pro tơ’lêi hlâu ăm mơngế Việt nam veăng ‘no hnoăng mơnhông  dêi Australia ƀă tơdroăng tơrŭm cheăng pơla péa tơnêi têa.

Xuân tung rôh lăm pôu kong têa Australia, Ngế pro xiâm hnê ngăn Chin phuh Phạm Minh Chính  hiăng tơdah Kăn pơkuâ Đảng Tự do Australia , pôa Peter Dutton. A rôh tơdah, Péa ngế Kăn vâ môi tuăn mơdêk tơpui tơno drăng ƀâng Đảng ƀă tơpui ƀă kuăn pơlê, pro tơ’lêi ăm mâu ngế tung khu kăn tơrŭm cheăng péa tơnêi têa tơkŭm po  pêi tơdroăng ‘na mơhno túa lĕm tro, tơ’noăng ivá,  ‘na tŏng kum.