Tiô tơbleăng, hơnăm 2023, Grup pơkuâ On tơhrik Việt Nam hiăng mơ-eăm pêi kêi đeăng mâu pơkâ pêi hnoăng cheăng pơkâ mơ’no tung mê tơdroăng pêt mơjiâng tơmeăm ƀă xing xoăng on tơhrik mê hiăng bê on tơhrik ăm tơdroăng cheăng kâ, tung mê hiăng ai tơdroăng ôh tá bê mơ’nui khế 5, apoăng khế 6 ƀă thế kơdroh on tơhrik a peăng kơnhŏng.

On tơhrik mơjiâng tâi tâng a kơmăi kơmok mơjiâng châ lối 280 rơtal kWh, tâk lối 4,5% tâng pơchông ƀă hơnăm 2022. Teăng mâ Chin phuh, Ngế pro xiâm hnê ngăn tơnêi têa Phạm Minh Chính mơnhên, kheăn kơdeăn tơdroăng mơ-eăm, tơdroăng châ tơƀrê ki Grup pơkuâ On tơhrik Việt Nam hiăng châ tơƀrê kum kal khât tung tơdroăng châ tơƀrê tơdjuôm hôm tâi tâng dêi lâp tơnêi têa tung hơnăm 2023.

Ngế pro xiâm hnê ngăn tơnêi têa pơkâ thế EVN mơ-eăm châ pêi kêi đeăng mâu pơkâ hnoăng cheăng châ pơcháu hơnăm 2024, rak tơniăn xing xoăng bê on tơhrik ăm mơnhông cheăng kâ – rêh ối pơlê pơla dêi tơnêi têa. Pơkâ xiâm kân má môi cho ôh tá ăm ai tơdroăng ti bê on tơhrik ăm mơjiâng pro tê mơdró ƀă xúa drêng lâi xuân hôm; pơkâ xiâm ki kân má péa cho thế pêi pro yă tiô pơkâ luât kơchơ mơdró, laga ai troăng hơlâ ƀă mơngế châ tŏng kum tung tơdroăng rêh ối pơlê pơla.