Tối tơbleăng a hneăng Hôp, Ngế pro xiâm hnê ngăn tơnêi têa Phạm Minh Chính khĕn kơdeăn tơdroăng ki xiâm dêi Tơpui tơno troăng rơhlâ tung pơla lâp plâi tơnêi trâm hên tơdroăng xơpá, pơloăng mơnúa; mơnê ai mâ dêi mâu khu tơrŭm cheăng a rôh tơpui, ing mê, rơtế ƀă Việt Nam ‘mâi mơnhông tuăn loi, hnê tối, pro xiâm vâ tơrŭm cheăng trâu rơdâ, tơƀrê tâ.

Ngế pro xiâm hnê ngăn tơnêi têa tối, tăng troăng ƀă hriăn tăng mâu khu  pêi cheăng mơnhông mơdêk nếo cho troăng rơhlê pêi ki xiâm dêi lâp plâi tơnêi nôkố; ôh tá xê môi tơnêi têa, môi tơdroăng cheăng kâ ki lâi, tâng xuân ối rah tuăn tơmiat môi tiah ton, bú kơnôm to a mơnhông cheăng kâ tiah hmâ ton nah, mơni kô mơnhông tơƀrê rĕng ƀă krá ton.