A chôu phut tơpui tơno mê, Ngế pro xiâm hnê ngăn Phạm Minh Chính vêh mơnhên Việt Nam đi đo ngăn nhoăm khât ƀă pói rơhêng vâ thăm mơdêk hên tâ nếo tơrŭm cheăng ƀă Hungary, cho pú hmâ ki tơrŭm tung hên kơvâ cheăng ki apoăng dêi Việt Nam a Trung Đông Âu. Péa ngế kăn hiăng tơpui tơno trâu rơdâ ‘na mâu troăng pơkâ cheăng ki kân ƀă mâu troăng hơlâ ki nhên vâ thăm mơdêk tơrŭm cheăng tung rêm kơvâ pơla Việt Nam ƀă Hungary tâk a tíu a’ngêi tâ.

Tơpui tơno ‘na mâu tơdroăng tung kopơng ƀă tung lâp plâi tơnêi rơtế vâ ‘nâi plĕng, péa ngế kăn hiăng môi tuăn kô vâ tơleăng mơnhên tiô kơ tơdroăng ki pro hơniâp lĕm, tơtro ƀă luât xiâm dêi lâp plâi tơnêi ƀă Tơdroăng pơkâ dêi Khu lâp kong têa, tung mê, ai tá tơdroăng ôh tá xúa pháu hơnêa lơ mơnhâu vâ ‘no lêng lo tơplâ, kring vế tơniăn tơdroăng pro hơniâp lĕm, tơniăn ƀă mơnhông a kơpong ƀă tung lâp plâi tơnêi.