A roh trâm mâ tơpui tơno, Ngế pro xiâm hnê ngăn Chin phuh Phạm Minh Chính hiăng tối tơbleăng ƀă Kăn xiâm pơkuâ kong têa Hungary Katalin Novak ‘na mâu tơdroăng châ tơƀrê ki kal ki péa pâ hiăng châ tơƀrê tung roh tơpui tơno pơla péa Ngế pro xiâm hnê ngăn tơnêi têa, tá mâu tơdroăng mơnhên troăng prôk la ngiâ ki kân vâ mơdêk tơrŭm cheăng nhŏng o tiô khôi vâi krâ nah ƀă khu tơrŭm tŭm têk pơla Việt Nam ƀă Hungary tung mâu kơvâ cheăng.

‘Na cheăng kal kí – tơpui kâ ƀă kong têa ê, Ngế pro xiâm hnê ngăn tơnêi têa Phạm Minh Chính pơkâ thế péa pâ pơtối thăm trâm mâ ƀă tơpui tơno mâu khu râ kăn xiâm, ki má lối cho khu râ kăn xiâm, xuân môi tiah pơla mâu Khu xiâm, kơvâ cheăng, kong pơlê vâ thăm mơdêk tơdroăng ki loi tơngah kal kí ƀă hlê plĕng dêi pó, pro xiâm kối vâ mơdêk ƀă po rơdâ tơrŭm cheăng pơla péa pâ tung rêm tơdroăng cheăng.

‘Na tơrŭm cheăng a mâu hneăng hôp tơpui tơno lâp plâi tơnêi, Ngế pro xiâm hnê ngăn Chin phuh Phạm Minh Chính ƀă Kăn xiâm pơkuâ kong têa Hungary Katalin Noval môi tuăn pơtối rak trâm mâ pakong mâu hneăng hôp tơpui tơno hên troăng, tơrŭm krá tơniăn, tŏng kum dêi pó a mâu khu tơrŭm cheăng lâp plâi tơnêi, ki má lối cho Khu lâp kong têa, ASEM, troăng pêi ASEAN – EU vâ veăng kum ăm hơniâp lĕm, tơniăn, tơrŭm ƀă mơnhông a kơpong ƀă lâp plâi tơnêi.