Tung kơthô, Ngế pro xiâm hnê ngăn tơnêi têa tố nhên: Têt khôi hmâ truyền Chôl Chnăm Thmây cho túa lĕm tro ki lĕm tơviah dêi hdroâng kuăn ngo Khmer, cho mơdĭng kân má môi tung hơnăm, ai pơxúa kal khât, pơxiâm hơnăm nếo ƀă tơdroăng loi, rơhêng vâ, rơkâu tơdroăng ki tơniăn lĕm má môi, tơdroăng rêh ối phâi hơtôu, hơniâp ro; xuân cho rôh mơhno hiâm mơno ki pâ mơnê troh jâ pôa.

Drêng kố, teăng mâ kăn pơkuâ Đảng ƀă Tơnêi têa, Ngế pro xiâm hnê ngăn tơnêi têa pơtroh kuăn pơlê, mâu vâ pú ƀă mâu jâ pôa hdroâng kuăn ngo Khmer hiâm mơno tơrŭm, rơkong kơ-êng ƀă rơkong rơkâu tơniăn lĕm má môi. Ƀă lối 1 rơtuh 300 rơpâu ngế, kuăn pơlê hdroâng kuăn ngo Khmer cho môi khu ki ôh tá chiâng klâ dêi mâu hdroâng kuăn ngo Việt Nam, ai hnoăng cheăng kal khât tung hnoăng cheăng mơjiâng ƀă rak vế Tơnêi têa.

Ngế pro xiâm hnê ngăn tơnêi têa pơkâ thế rêm râ, kơvâ cheăng, kong pơlê hbrâ rơnáu tro mâu tơdroăng ăm kuăn pơlê hdroâng kuăn ngo Khmer tơdah têt Chôl Chnăm Thmây hơnăm 2024 tơrŭm, hơniâp ro, rơdêi, tơniăn, kơdĭng, tro ƀă túa rêh ối rơkê, khôi túa tơlá lĕm tro dêi hdroâng kuăn ngo.

Um: Túa mơhum xeăng Phop ƀă têa vât kế xú hŏm, xêa jiếo mâu tơdroăng ki ôh tá mơhúa tung hơnăm ton vâ mot tung hơnăm nếo mâu tơdroăng châ tiô tơdroăng ki rơhêng vâ (Um: TTXVN)