Kơxê hâi lơ 17/4/2023, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah ngế xiâm tơpui kâ Kong têa Áo   Alexander Schallenberg drêng rôh lăm pôu Việt Nam sap hâi lơ 16- 18/4/2023.  A rôh tơdah, pôa Phạm Minh Chính hâk mơnê hneăng lăm pôu Việt nam ki apoăng dêi pôa Alexander Schallenberg khĕn kơdeăn tơdroăng hôp tơpui tơno ƀă pôa Bùi Thanh Sơn - Ngế xiâm tơpui kâ  ƀă hneăng Hôp tơrŭm pơla Việt Nam - Áo ƀă tơdroăng veăng pêi dêi hên khu mơdró péa pâ a kơxo hâi lơ 17/4/2023; tối loi khât hneăng lăm pôu vâ tơdroăng tơrŭm cheăng lĕm tâ pơla Việt Nam - Áo rế mơnhông tơƀrê tung tâi tâng tơdroăng cheăng.

Pôa Phạm Minh Chính tối, Việt Nam đi đo nhoăm ƀă vâ mơdêk tơrŭm cheăng ƀă kong têa Áo, môi kong têa tung khu ki kal dêi Khu tơrŭm Châu Âu (EU). Ngế pro xiâm hnê ngăn tơnêi têa tối nhên, péa pâ kal tơbleăng mâu troăng rơhlâ mơdêk tơrŭm cheăng pơla péa pâ tung mâu tơdroăng cheăng ki péa pâ ai hlâu ƀă kal vâ môi tiah khoa hok- kŏng ngĕ, mơjiâng hngêi trăng troăng klông, pêi cheăng, hnê mơngế cheăng, pơ’lêh kơxô̆,  pơ’lêh cheăng kâ, pơ’lêh ngiât lĕm.