A roh trâm mâ, pơtáu Brunei phiu ro hlo tơdroăng tơrŭm cheăng pơla Việt Nam ƀă Brunei pơtối mơnhông lĕm tro tâ lối 30 hơnăm hiăng hluâ. Pơtáu kong têa Brunei tối péa tơnêi têa ối hên tơmeăm kal xúa, mơnhông hên tâ mê nếo môi tiah têa châu, trếo pơkeăng, pêi chiâk deăng, ká xi xŏng, ôm hyô, uâ mơdiê tơmeăm kâ Halal.

‘Na mơnhên troăng tơrŭm cheăng pơla péa pâ, pôa Phạm Minh Chính, Ngế pro xiâm hnê ngăn tơnêi têa pơkâ thế Brunei pơtối pro tơ’lêi hlâu ăm mâu khu tê mơdró Việt Nam tơrŭm tê mơdró tung kơvâ têa châu, trếo pơkeăng, kế kâ; pro ăm tơ’nôm mơ-éa ăm phêp mâu tuk ká, kuăn pơlê tơnăng ká xi xŏng Việt Nam tơnăng ká xi xŏng a kơpong têa kơxĭ Brunei; tơdrêng amê tŏng gum Việt Nam pro ăm chưng chih, mơjiâng pro kế kâ Halal ƀă xúa ki tơ’lêi hlâu tơmeăm hên hĭn dêi Việt Nam.

Klăng roh kố, péa kăn xiâm pơkuâ môi tuăn pơtối pêi pro châ tơƀrê Tơdroăng pêi pro po rơdâ tơrŭm cheăng Tâi tâng Việt Nam – Brunei hneăng hơnăm 2023 – 2027, ƀă pêi trâu hơngế tơrŭm cheăng pơla péa tơnêi têa tung la ngiâ.