Ngế pro xiâm hnê ngăn tối nhên, luâ 8 rôh tơkŭm po, pri Búa liềm Vàng hiăng mơhno ki nhoăm, ki kân tung mâu pri hlá tơbeăng tơnêi têa, hên ngế tơmâng vâ ‘nâi plĕng, kăn hnê mơhno dêi rêm râ ủy Đảng, tơ’mot hên khu râ kuăn pơlê, hiăng chiâng tơdroăng leh kân tơkôm, púi ngah hdrối vâ troh tơbâ hâi mơjiâng Đảng rêm hơnăm ƀă kố cho tơdroăng ki mơhno inâi, ki nhoăm, ki pơ-eăng troh lâp lu dêi Pri.

Vâ ai tro hôm tâ ki mê hnoăng cheăng pêi tung la ngiâ, Ngế pro xiâm hnê ngăn púi vâ ƀă loi Pri Búa liềm Vàng pơtối rak vế tâ nếo tơdroăng hiăng châ pêi pro, châ pơtối hơ’lêh nếo, hriăn plĕng ki nếo tơbleăng troh lâp lu ƀă tơdjâk tro dêi Pri, veăng mơjiâng, ‘mâi rơnêu Đảng, mơjiâng khu cheăng kal kí mơjiâng khu kăn ƀô̆ krá lĕm rơdêi; veăng ‘no hnoăng tơƀrê tung mơjiâng ƀă kring vế Tơnêi têa Việt Nam xah hô̆i chuh ngiah; xua kuăn pơlê kro mơdrŏng, tơnêi têa rơdêi, kuăn pơlê môi tuăn tơdâng, rơkê plĕng.