Hâi lơ 12/4, a rôh hôp má 5 Khu hnê mơhno dêi Tơnêi têa mâu tơmeăm khoăng, tơdroăng tơkêa bro ki kal dêi tơnêi têa, pôa Phạm Minh Chính - Ngế pro xiâm hnê ngăn tơnêi têa hiăng pơcháu mâu tơdroăng cheăng ƀă tơrêm khu tơdroăng tơkêa bro i nhên ăm mâu khu xiâm, kơvâ cheăng, kong pơlê, tíu pêi cheăng hbrâ pêi mâu hnoăng cheăng tung la ngiâ. Malối ƀă khu tơdroăng tơkêa bro ki dế pro, tung mê 3 tơdroăng tơkêa bro troăng kân lĕm kô pê klêi ƀă xúa a rôh leh hâi lơ 30/4 hơnăm kố (mê cho: Mai Sơn - Troăng kân 45; Dầu Giây - Phan Thiết; Phan Thiết - Vĩnh Hảo).

Ngế pro xiâm hnê ngăn tơnêi têa pơkâ thế, Khu xiâm ngăn troăng prôk rơxế kơtâu thế pêi kơtăng khât hnê mơhno mâu khu mơjiâng pro thâ pêi pro, hbrâ tơmeăm mơngế vâ teăm xúa tro tơdroăng, tơniăn tro tro kih thuât - lĕm mơnâ mâ ngăn, tơniăn tung pêi cheăng, tơniăn hyôh kong prâi. Ƀă 14 to kong pơlê, pơlê kong kân cho kơ koan xiâm dêi 3 troăng kân tơdrăng peăng Mâ Hâi lo - Ma Hâi Luô ƀă 2 troăng ví pá kĭng.

Ngế pro xiâm hnê ngăn tơnêi têa pơkâ thế rĕng tơbleăng vâ pêi tơdroăng tơkêa bro hdrối hâi lơ 30/6/2023. Ngế pro xiâm hnê ngăn tơnêi têa xuân pơkâ thế Khu xiâm ngăn troăng prôk thế tơrŭm ƀă mâu khu xiâm, kơvâ cheăng, kong pơlê thâ ngăn vâ ‘nâi tơdroăng pêi pro, tơleăng mơnhên, pro hlá mơ-éa mâu tơdroăng tơkêa bro; tơkŭm tâi mâu tơdroăng ki ôh tá tro tơdjâk troh pơ’lêh tơnêi pêt báu, tơnêi kong, luât pơkâ, luât tŏng kum ƀă mâu tơdroăng tŏng kum pêi vâ tơbleăng ăm Vi ƀan pơkuâ Kuô̆k hô̆i, Kuô̆k hô̆i séa ngăn.