Tung mâu hơnăm hdrối mê hía nah ƀă hơnăm 2023, Khu kăn Đảng ủy, Khu pơkuâ tơmâng tong tơdroăng kal II  hiăng pơkuâ hnê mơhno, hnê pê klêi ƀă pêi rơkê mâu tơdroăng cheăng tối ăm ‘nâi mâu tơdroăng kal, tí tăng ‘nâi plĕng ‘na troăng vâ pêi ƀă tơdroăng tơmâng tong tơdroăng kal; teăm tối pơtâng tơdrêng ăm Kăn xiâm pơkuâ hnê Đảng, Tơnêi têa, Khu xiâm pơkuâ ngăn lêng tơnêi têa, Khu xiâm pơkuâ ngăn lêng tơkăng kong pơkâ mâu luât pêi tơtro, ôh tá kơdrâ, hbrâ rơnáu ‘na tơdroăng tơplâ, châ kăn xiâm ƀă mâu khu râ, khu xiâm, kơvâ cheăng, kong pơlê tơring khĕn kơdeăn.

Tối tơbleăng ƀă mâu kăn ƀô̆ xiâm dêi Khu xiâm tơmâng tong tơdroăng kal, Ngế pro xiâm hnê ngăn Chin phuh Phạm Minh Chính tối, khĕn kơdeăn tơdroăng kơdôu mơ-eăm ƀă mâu hnoăng ki Khu xiâm tơmâng tong tơdroăng kal II hiăng pêi châ tơƀrê tung mâu hơnăm hdrối, ƀă tối hơnăm 2024 ƀă tung la ngiâ, tơdroăng tung lâp plâi tơnêi ƀă tung kơpong tiô tối hdrối pơtối ôh tá tơniăn, pá vâ ‘nâi hdrối, pơkâ thế Khu cheăng tơmâng tong tơdroăng kal ‘na lêng thế hbrâ rơnáu tâ nếo, pêi tro tâ, hbrâ xo tŭm tơdroăng pơcháu ƀă pê klêi tŭm tơdroăng ki Đảng, Tơnêi têa pơcháu.

Ngế pro xiâm hnê ngăn tơnêi têa pơkâ thế pơtối rak vế tí tăng ‘nâi plĕng mâu luât pơkâ tơdroăng hbrâ tơplâ, vâ rĕng ‘nâi mâu tơdroăng, tơniăn gak kring tơniăn tơdroăng rêh ối, tơniăn ‘na tơmeăm khoăng, mơnhông ‘na tuăn ngôa ăm khu Mô đô̆i drêng troh Têt Lo hơnăm nếo Giáp Thìn 2024.