Tiô hâi pơkâ kơxo hâi lơ 6/3 Ngế pro xiâm hnê ngăn tơnêi têa Phạm Minh Chính kô veăng hôp tâi tâng dêi hneăng Hôp ƀă rôh hôp iâ mơngế. Hneăng hôp mâu Kăn xiâm po sap hâi lơ 4 troh hâi lơ 6/3 cho hdró ki kal tơdroăng ki kal tơdjuôm dêi Australia ƀă tung kơpong.

Rôh ki hdró mê mơhno ki tơhrâ dêi Australia tung tơdroăng mơdêk tơrŭm cheăng ƀă kơpong Đông Nam Á. Tơdroăng ki kal dêi hneăng hôp mâu Kăn xiâm malối rôh kố cho leh tơbâ 50 hơnăm tơrŭm tơrŭm tơpui kâ Australia - ASEAN ƀă kô tơkŭm a pŭn tơdroăng pơkâ ki xiâm: Tê mơdró, Kăn xiâm nếo xông, Hyôh kong prâi ƀă On tơhrik krúa ƀă Tơrŭm cheăng a Têa kơxĭ.

Mâu tơdroăng cheăng ki nhên tá: Hneăng hôp CEO Khu mơdró kô tơkŭm mâu kăn xiâm khu mơdró Australia ƀă Đông Nam Á, rêm pâ ki tơdjâk troh tung mâu kơvâ cheăng ƀă kơmăi kơmok ƀă mâu kơ koan chin phuh vâ tơpui ‘na mâu tơdroăng mơdêk tơƀrê tê mơdró ƀă ‘no liăn cheăng pơla péa pâ.

Hneăng hôp Mâu khu mơdró krâ kơvâ ƀă kŭn (SME); Hneăng hôp tơpui ‘na hyôh kong prâi ƀă ‘na On tơhrik krúa; Hneăng hôp tơrŭm cheăng a Têa kơxĭ.