Ngế pro xiâm hnê ngăn tơnêi têa tối nhên ing tơdroăng “kong pơlê pơkâ, kong pơlê pêi, kong pơlê pôu râng hnoăng cheăng’’, tơdrêng ƀă xing xoăng mơngế pêi cheăng, mơdêk ivá cheăng rơkê ƀă mơdêk hnoăng cheăng séa ngăn, tăng ngăn, hbrâ mơdât kâ kơluâ. Ngế pro xiâm hnê ngăn tơnêi têa pơkâ thế Khu xiâm ngăn ‘na luât ƀă Khu xiâm ngăn mơngế pêi cheăng môi tuăn ‘na kơxô̆ ‘na mâu pơkâ xoăng râ, xoăng hnoăng pơkuâ ing Chin phuh troh mâu khu xiâm, kơvâ cheăng, kong pơlê; tung mê, ai kơxô̆ 28 pơkâ hiăng châ mơjiâng ƀă troh hâi lơ 30/5, tâi tâng 28 pơkâ châ mơnhên klêi ƀă kal thế po ngăn tơbleăng ăm Khu xiam Kal kí.

Ngế pro xiâm hnê ngăn tơnêi têa tối tiah kố, sap nôkố troh hâi lơ 10/6, mâu khu xiâm, kơvâ cheăng tơmâng xo veăng hnê tối nếo a mâu tơdroăng rak tơniăn tro ƀă ki ai khât, ôh tá lôi ki lâi, ôh tơvâ tơvân... Mâu Phŏ Ngế pro xiâm hnê ngăn tơnêi têa châ pơcháu hnoăng cheăng séa ngăn nếo, pê klêi ƀă ki hrá troh hâi lơ 15/6 thế pơkâ tŭm mâu pơkâ. Kơ’nâi mê, tiô tối hdrối kô tơkŭm po hôp tơbleăng troh kong pơlê cheăm, ki hrá gá thế pê klêi hdrối hâi lơ 18/6.