Rôh hôp Khu râ kăn xiâm ki tơviah po ing hâi lơ 4 troh lơ 6/3 cho tơdroăng ki kal sap nah tá hâi chói ai tơdjuôm dêi Australia ƀă kơpong. Cho tơdroăng ki vâ mơhno tơhrâ dêi Australia tung tơdroăng thăm mơdêk tơrŭm ƀă kơpong Đông Nam Á. Tơdroăng kal dêi Rôh hôp Khu râ kăn xiâm tơviah rôh kố cho tơbâ 50 hơnăm tơrŭm cheăng tơpui kâ Australia – ASEAN.

Rôh hôp Khu râ kăn xiâm tơviah tơkŭm tung 4 kơvâ cheăng ki xiâm: Tê mơdró, Pơkuâ nếo, Hyôh kong prâi ƀă On tơhrik krúa, ƀă Tơrŭm a troăng têa kơxĭ. Mâu tơdroăng cheăng pêi pro ki nhên, mê cho: Rôh hôp CEO Khu mơdró kâ tơkŭm mâu kăn pơkuâ khu mơdró kâ dêi Australia ƀă Đông Nam Á; Rôh hôp Mâu khu mơdró kâ krâ kơvâ ƀă kŭn (SME); Rôh hôp Kong prâi ƀă On tơhrik krúa; Rôh hôp tơrŭm cheăng têa kơxĭ.

Rôh lăm pôu păng ‘nâng Australia ƀă New Zealand dêi Ngế pro xiâm hnê ngăn tơnêi têa Phạm Minh Chính prế kơdrâi pôa rơtế ƀă Khu kăn xiâm Việt Nam, kô kum pro ó rơdêi trâu hngế tâ tơrŭm cheăng ƀă Australia ƀă New Zeand ƀă vâ pơtối tơbleăng troăng hơlâ tơpui kâ môi tuăn ki Hneăng hôp Đảng rôh 13 hiăng mơ’no.