Tung péa hâi pêi cheăng đi đo ƀă chôu pêi cheăng ôh tá ai tíu pơhôi ƀă lối 30 tơdroăng hôp, tơpui tơno, roh lăm pôu pêi cheăng dêi Ngế pro xiâm hnê ngăn Chin phuh Phạm Minh Chính veăng Hneăng hôp WEF Davos roh má 54 hiăng châ tơƀrê lĕm a hên tơdroăng, châ a kơlo hên má môi a tâi tâng mâu pơkâ pêi plah, pơkâ hnoăng cheăng pơkâ mơ’no, pro ai tơdroăng tơbâ ki trâu hơngế ƀă troh lâp lu rơdêi um méa dêi môi Việt Nam ƀă hên tơmeăm ki mơdêk, tíu cheăng ƀă ki loi tơngah nếo.

Mâu tơdroăng xông tơpui dêi Ngế pro xiâm hnê ngăn Chin phuh hiăng tơbleăng tơdroăng ki pơtâng hnê tối nhên ‘na tơnêi têa Việt Nam mơnhông ƀeăn ƀĕng rơkê, pơhlêh nếo, cho tíu troh hâk vâ mơ’no liăn cheăng má môi ăm mâu grup pơkuâ lâp plâi tơnêi.

Roh lăm pôu pêi cheăng păng ‘nâng kong têa Hungary ƀă Romania klêi kơ’nâi veăng WEF Davos dêi Ngế pro xiâm hnê ngăn Chin phuh Phạm Minh Chính xuân hiăng châ tơƀrê lĕm. Tung roh lăm pôu pêi cheăng, Ngế pro xiâm hnê ngăn tơnêi têa Phạm Minh Chính hiăng ai lối 30 roh trâm mâ, tơpui tơno ƀă khu râ kăn pơkuâ xiâm dêi Tơnêi têa, Chin phuh, Kuô̆k hô̆i, Đảng kal kí péa tơnêi têa, xông tơpui troăng hơlâ a mâu hngêi trung đăi hok, veăng hôp tơpui tơno khu tê mơdró, trâm mâ khu nhŏng o péa tơnêi têa ƀă Việt Nam, trâm mâ pơlê pơla vâi krâ kuăn pơlê mơngế Việt Nam ƀă lăm pôu mâu tíu cheăng kâ, khoa hok kih thuât.