Xông tơpui a roh pêi cheăng, Ngế pro xiâm hnê ngăn tơnêi têa Phạm Minh Chính tối nhên hneăng hôp vâ mơnhên tơdroăng pêi cheăng dêi Vi ƀan mâu grup, kŏng ti ối tung tung hơnăm 2023 ƀă mâu hnoăng cheăng, troăng pêi pro pêt mơjiâng tơmeăm, tê mơdró hơnăm 2024 ƀă mơdêk mơ’no liăn cheăng mơnhông cheăng kâ – rêh ối pơlê pơla.

Ngế pro xiâm hnê ngăn tơnêi têa tối nhên, hnoăng cheăng hơnăm 2024 kân tâ hơnăm 2023, kal thế kêi đeăng lĕm tâ hơnăm 2023. Ƀă pói vâ tung hơnăm 2024, mâu grup, kŏng ti xiâm thế mơ’no liăn cheăng hên tâ, Ngế pro xiâm hnê ngăn tơnêi têa pơkâ thế mâu kăn teăng mâ tơkŭm tơpui tơno, tơpui tối, mơnhông hnoăng tuăn ngôa rơkê khu pú hên, mơnhên mâu troăng mơnhông la ngiâ, troăng pêi, hnoăng cheăng ki xiâm hơnăm 2024 dêi Vi ƀan mâu grup, kŏng ti xiâm tung pêi pro pơkâ mơnhông cheăng kâ – rêh ối pơlê pơla 2024, ki rơhêng vâ tối cho hnoăng mơ’no liăn mơnhông.