Rôh hôp kố cho tơkŭm tơpui tơno ƀă 5 tơdroăng ki xiâm, tung mê ai 3 tơdroăng tơkêa Luât cho: Luât ki ‘Mâi hơ’lêh, ‘mot tơ’nôm mâu tơdroăng dêi Luât gak ngăn; Luât Hbrâ, mơdât roê tê mơngế ki ‘mâi hơ’lêh; Luât Công chứng ki ‘mâi hơ’Lêh ƀă 2 tơdroăng pơkâ mơjiâng luât cho: Luât nâp hnoăng liăn mơhá pêi lo liăn khu mơdró kâ ki ‘mâi hơ’lêh; Luât Pêi pro tơdroăng xôi kuăn pơlê ki ‘mâi hơ’lêh.

Klêi mê ai tối nhên tiah kố, rôh hôp ƀă 5 tơdroăng ki xiâm, pơrá cho mâu tơdroăng ki kal, xơpá, ai tơdjâk troh cheăng kâ rêh ối pơlê pơla trâu rơdâ, Ngế pro xiâm hnê ngăn tơnêi têa pơkâ thế mâu ngế cheăng tung Chin phuh tơkŭm tuăn ngoâ; mơdêk rơkong tơpui ‘nâng ‘nâi, tơkŭm tơpui ‘na mâu tơdroăng ki kal, ối ai rơkong tơpui phá dêi rơpó kal châ tơpui, pâ rơkong tơpui ing Chin phuh, rak tơniăn tơdroăng pơkâ, rơkê dêi Rôh hôp.

Malối, Ngế pro xiâm hnê ngăn tơnêi têa pơkâ thế mâu kơ koan um tơvi, rơ’jíu kơjo mơ’no hên tâ chôu ki mơ’no mâu tơdroăng hnê tối mơjiâng luât, troăng hơlâ tŏng kum, hnê hriâm tơdroăng ki hlê plĕng ăm kuăn pơlê, malối cho ăm rơkong tơpui tối ‘na luât dêi mâu ngế ki tro tơdjâk, mâu khu ki rơkê, khu ki hriăn ‘na khoa hok, tơdroăng ki rơkê dêi kong têa ê.