A rôh hôp, mâu ngế cheăng dêi Hô̆i đong mơnhên tối tơdroăng cheăng tơ’noăng, khĕn kơdeăn ƀă tơpui tối leăng xiâm kối, ƀai hriâm ki rơkê ƀă mơ’no mâu hnoăng cheăng pơkâ pêi, troăng hơlâ tung hơnăm 2024 vâ hơ’lêh nếo mơdêk rơkê tung hnoăng cheăng tơ’noăng, khĕn kơdeăn; pêi klêi pơkâ pêi cheăng dêi Hô̆i đong tiô troăng xing xoăng nhên hnoăng cheăng, mơdêk hnoăng cheăng dêi rêm ngế cheăng, mơdêk xêt khât, tơƀrê dêi Hô̆i đong.

Hơnăm 2023, hên tơdroăng tơ’noăng châ tơbleăng pêi tơƀrê, ai ivá tơdjâk troh; Hnoăng cheăng ô eăng mâu ngế ki kơhnâ rơkê ƀă khĕn kơdeăn châ pêi pro teăm tơdrêng, Kăn xiâm hnê ngăn tơnêi têa, Ngế pro xiâm hnê ngăn Chin phuh hiăng ai lối 1.900 pơkâ khĕn kơdeăn ăm lối 103.600 khu pú hên, ngế krê ki rơkê.

Tơpui a rôh hôp, Ngế pro xiâm hnê ngăn tơnêi têa tối nhên, khĕn kơdeăn athế tro, ‘ló, teăm tơdrêng ƀă athế tơmâng ngăn troh hnoăng cheăng séa ngăn, mơnhên tối; pêi pro mâu tơdroăng tơ’noăng, khĕn kơdeăn, ví tơdroăng ki tơbleăng tơ’noăng tiô túa pơkâ, vâ pôi tá ai tơdroăng ki ôh tá tro; Mơdêk hnoăng cheăng hnê tối; teăm châ hlo, hnê tơ’nôm ƀă po rơdâ mâu ngế ki rơkê.