Tung tơdroăng hơtô, hiâm mơno ki khât, hâk ro, xông tơpui a roh trâm mâ, Ngế pro xiâm hnê ngăn Chin phuh tối ăm ‘nâi, hâi lơ 22/12/2023, vâ chê 2 rơtal ngế kuăn pơlê tung lâp plâi tơnêi tơdah tơdroăng phiu ro drêng Grup kring vế Khu lâp kong têa hiăng tơbleăng ăm pêi pro pơkâ mơnhên Têt Lo hơnăm nếo cho hâi pơtê leh rêm hơnăm dêi Khu lâp kong têa.

Kố cho tơdroăng ki phiu ro ăm vâ chê 2 rơtal mơngế tung lâp plâi tơnêi. Klăng roh kố, teăng mâ khu râ kăn pơkuâ Đảng, Tơnêi têa ƀă kuăn pơlê Việt Nam, Ngế pro xiâm hnê ngăn tơnêi têa tá hiêm mơno mơnê mâu Kăn teăng mâ, kăn teăng mâ tơpui kâ ƀă kong têa ê, Kăn pơkuâ teăng mâ mâu khu tơrŭm cheăng lâp plâi tơnêi ‘na tơdroăng tuăn pâ tá hiâm mơno, tơdroăng tơrŭm châ tơƀrê, tŏng kum kơnía ăm Việt Nam tung hơnăm 2023 ƀă plâ tung pơla kố nah.

Ngế pro xiâm hnê ngăn tơnêi têa pói vâ ƀă loi tơngah mâu Kăn teăng mâ, kăn teăng mâ tơpui kâ ƀă kong têa ê, Kăn pơkuâ teăng mâ mâu khu tơrŭm cheăng lâp plâi tơnêi a Việt Nam pơtối mơnhông châ tơƀrê hnoăng tơdjêp ki má môi dêi tơná, djâ tơrŭm cheăng pơla mâu kong têa, mâu khu tơrŭm cheăng lâp plâi tơnêi ƀă Việt Nam rế hía rế tơdjêp krá tơniăn tâ, trâu hơngế, châ tơbrê tâ; xua môi lâp plâi tơnêi hơniâp lĕm, tơrŭm nhŏng o, tơrŭm ƀă mơnhông krá tơniăn.