Ngế pro xiâm hnê ngăn tơnêi têa Phạm Minh Chính ăm ‘nâi, Việt Nam đi đo ngăn nhuô̆m pro trâu rơdâ tơrŭm cheăng ƀă Alơmăng tung mâu kơvâ cheăng ƀă mơnhên tối khât tơdroăng cheăng tê mơdró dêi Siemens tung lâp plâi tơnêi tối tơdjuôm ƀă a Việt Nam tối krê, malối cho mâu tơdroăng tơkêa tung mâu kơvâ cheăng on tơhrik – hâng pơklĕp meăm, hâng pro mâu kế tơmeăm, bro hngêi trăng troăng klông on tơhrik ƀă pro hơ’lêh tơdroăng cheăng ƀă kơmăi kmok, bro troăng rơxế lơ treng.

Vâ veăng kum pơtối tơbleăng bro mâu tơdroăng tơkêa dêi kăn pơkuâ rêm râ pơla péa tơnêi têa, Ngế pro xiâm hnê ngăn tơnêi têa pơkâ thế Siemens mơdêk rơdêi tơrŭm cheăng ƀă Việt Nam tung mâu kơvâ cheăng ƀă kơmăi kơmok rơxông nếo, mơdêk hơ’lêh nếo túa tơmiât rơkê; tơrŭm hơ’lêh ngiât, mơnhông kơvâ cheăng ƀă kơmăi kơmok on tơhrik vêh bro, hơ’lêh kơxô̆, mơjiâng pro tíu xiâm hriăn ngăn ƀă mơjiâng pro dêi Siemens a Việt Nam ƀă hên ki ê.

Siemens cho Grup pơkuâ ki kân dêi Alơmăng, ai hên tơdroăng ki rơkê plĕng ƀă troăng hơlâ pêi pro ki rơkê tung kơvâ cheăng ƀă kơmăi kơmok, rak ngăn ivá, troăng prôk ƀă mơjiâng bro hngêi trăng troăng klông rơkê. Grup pơkuâ ai 320 rơpâu ngế cheăng ƀă kơxô̆ liăn châ xo tung lâp plâi tơnêi cho 78 rơtal euro a hơnăm 2023.