A rôh tơdah, péa pâ môi tuăn pơtối thăm pơtroh mâu khu râ kăn ƀă rêm khu râ pơkuâ cheăng ƀă mâu kong pơlê troh a tơnêi têa dêi rơpó; tối nhên tơdroăng ki trâm mâ đi đo pơla mâu kăn pơkuâ péa tơnêi têa veăng kum ‘mâi mơnhông, mơdêk hiâm mơno tơdroăng kal kí ƀă mơdêk tŭm têk tơrŭm cheăng pơla péa pâ.

Kăn xiâm pơkuâ kong têa Marcos Jr. môi tuăn ƀă tơdroăng ki pơkâ thế dêi Ngế pro xiâm hnê ngăn tơnêi têa Phạm Minh Chính ‘na tơdroăng ki mơdêk rơdêi tơrŭm tung mâu kơvâ cheăng ối ai hên tơdroăng ki ai hlâu môi tiah hnê hriâm – hnê cheăng, khoa hok kong ngê̆, ôm hyô, mơhno túa lĕm tro, trâm mâ kuăn pơlê, tơrŭm pơla kong pơlê.

Tơpui tơno ‘na mâu tơdroăng kong têa ê ƀă tung kơpong, péa ngế kăn xiâm pơkuâ mơnhên tối khât tơdroăng ki péa tơnêi têa đi đo tơrŭm krá tơniăn a mâu rôh hôp tung kơpong ƀă a kong têa ê môi tiah ASEAN, Khu lâp kong têa, APEC, ASEM; tối nhên tơdroăng ki rak vế tơrŭm ƀă hnoăng cheăng tíu xiâm dêi ASEAN, môi hiâm mơno mơjiâng môi Pơlê pơla ASEAN krá rơdêi, tơrŭm ƀă mơ-eăm xêh.