Rôh trâm mâ cho rôh vâ kăn pơkuâ Chin phuh, mâu khu xiâm, kơvâ cheăng tơmâng rơkong tơpui dêi khu mơdró kâ, ƀă tơdroăng ki rêm kơvâ cheăng, rêm râ, rêm ngế tơdjuôm ivá, veăng kum ivá, mơ-eăm tung mâu hnoăng cheăng, hnoăng pơkuâ châ pơcháu vâ veăng kum ƀlêi chiâng kân kĭn mâu tơdroăng cheăng, tơkâ luâ xơpá. Ngế pro xiâm hnê ngăn tơnêi têa tối rơdêi, Đảng, Tơnêi têa ƀă Kuăn pơlê đi đo cho tíu hơgiên, đi đo tơngah tung khu mơdró kâ, khu mơdró kâ Việt Nam kô mơnhông rơtế ƀă tơnêi têa, tơdjuôm ivá pêi klêi hnoăng cheăng mơjiâng ƀă rak vế Tơnêi têa.

Teăng mâ Chin phuh, Ngế pro xiâm hnê ngăn tơnêi têa tơmâng xo, khê̆n kơdeăn ƀă mơnê ivá mơ-eăm, mâu tơdroăng ki hiăng pêi pro klêi dêi khu mơdró kâ tơnêi têa, veăng kum tung tơdroăng ki ƀlêi chiâng dêi tơnêi têa. Ngế pro xiâm hnê ngăn tơnêi têa pơkâ thế mâu kăn tơkŭm mơnhên tối tơdroăng cheăng ki ai tơdjâk troh mơnhông khu mơdró kâ tơnêi têa, mâu tơdroăng ki tơ’lêi hlâu ƀă ki xơpá nôkố; mâu troăng hơlâ vâ tí tăng tơƀrê tâ nếo kế tơmeăm, vâ khu mơdró kâ tơnêi têa djâ troăng ahdrối, pơkuâ djâ, pơkâ troăng pêi, pro ivá, pơtroh tơdroăng ki hâk vâ ăm khu mơdró kâ tối tơdjuôm ƀă mơdêk rơdêi mâu ivá mơdêk nếo.