A rôh trâm mâ, teăng mâ mâi khu pơkuâ Romania hiăng tối nhên ăm Ngế pro xiâm hnê ngăn tơnêi têa Phạm Minh Chính ‘na hnoăng cheăng dêi khu, malối cho mâu tơdroăng cheăng vâ thăm mơdêk trâm mâ kuăn pơlê, ing mê veăng kum tung tơdroăng ki thăm mơdêk tơrŭm cheăng pơla péa tơnêi têa. Mâu vâi pú Romania tối ăm Ngế pro xiâm hnê ngăn tơnêi têa Phạm Minh Chính ‘na tơdroăng ki ôh tá chiâng piu cho tơdroăng mơnhông rơdêi dêi Việt Nam tung mâu kơvâ cheăng tung pơla hdrối nah; pơkâ mơ’no mâu túa tơrŭm cheăng tung la ngiâ, tung mê ai tá tơdroăng ki hriăn ngăn, tăng ‘nâi rôh pêi cheăng kâ pơla péa tơnêi têa.

Ngế pro xiâm hnê ngăn tơnêi têa Phạm Minh Chính pơkâ thế mâu vâi pú Romania pơtối mơhnhôk kuăn pơlê pơtối tŏng kum Việt Nam, thăm mơdêk tơrŭm pêi cheăng kâ ƀă Việt Nam. Ngế pro xiâm hnê ngăn tơnêi têa tơngah, tung la ngiâ, tơrŭm cheăng pơla péa tơnêi têa kô rế hía rế krá tơniăn, tơƀrê tâ.