Hneăng hôp tơpui tơno châ tơkŭm po a Đăi hok RMIT, pơlê kong kân Melbourne, kong pơlê Victoria, xua Khu xiâm pơkâ túa cheăng ƀă mơ’no liăn cheăng ƀă Kăn teăng mâ Việt Nam a Australia tơrŭm ƀă Kơ koan Tê mơdró ƀă Mơ’no liăn cheăng Australia, Kơ koan teăng mâ kong têa Australia a Việt Nam tơkŭm po tơdroăng ki veăng dêi kơdrâm mâu khu mơdró péa tơnêi têa.

A kố, mâu kăn teăng mâ tơbleăng ‘na mâu tơmeăm ki ai hlâu, tíu mơ’no liăn cheăng, tê mơdró dêi Việt Nam ƀă Australia; tơmâng tơbleăng ‘na ivá ƀă pơkâ pêi mơ’no liăn cheăng, tê mơdró dêi mâu khu tê mơdró péa tơnêi têa Kheăn kơdeăn tơmeăm ki ai hlâu mơnhông dêi kơchơ mơdró liăn ngân a Việt Nam; Mơnhên ‘na tơrŭm cheăng mơ’no liăn cheăng tung kơvâ pêi chiâk deăng xúa kŏng ngê̆ rơxông nếo dêi khu tê mơdró Việt Nam a Australia.

Ki rơhêng vâ tối, Hneăng hôp tơpui tơno mơdoh chôu vâ mâu khu tê mơdró kơ-êng mâu tơdroăng ƀă châ khu râ kăn pơkuâ mâu khu xiâm, kơvâ cheăng péa pâ tiâ mâu tơdroăng tơmâng môi tiah: Troăng pêi ton xŏn mơnhông cheăng kâ dêi rêm kong têa; mâu kơvâ ki kơjo; troăng hơlâ tŏng kum; pro hlá mơ-éa, hngêi trăng troăng klông, mơngế pêi cheăng ƀă hía hé. Rơtế ƀă mê, khu tê mơdró péa pâ rơtế tơpui tơno, tơdjêp vâ tơrŭm mơ’no liăn cheăng, tê mơdró.

Xông tơpui a hneăng hôp tơpui tơno, Ngế pro xiâm hnê ngăn tơnêi têa pơkâ thế tung tơrŭm cheăng, péa pâ tơkŭm mơdêk mâu ivá tơtêk tiô khôi vâi krâ nah môi tiah mơ’no liăn cheăng, tê ngi kong têa ê, xúa mâu tơmeăm khoăng, pơhlêh xúa kŏng ngê̆, pơhlêh pêi krúa kong prâi. Ngế ối a ko Chin phuh xuân pói rơhêng vâ péa pâ pơtối mơdêk tơrŭm cheăng trâm mâ kuăn pơlê, ôm hyô, khôi túa lĕm tro ƀă hnê hriâm hnê mơjiâng tiô troăng mơnhông mơdêk rơdêi khôi túa ki má môi ƀă hên dêi péa hdroâng mơngế.