Kơmăng hâi lơ 1/2, a Hà Nội, Ngế pro xiâm hnê ngăn tơnêi têa Phạm Minh Chính veăng leh diâp Pri hlá tơbeăng Búa liềm vàng rôh má 8 hơnăm 2023. Ai 72 ƀai chêh rơkê tơtro châ Khu tơkŭm po rah xo mơhá pri cho teăng mâ mâu ngế rơkê tung 2 rơpâu 216 ƀai chêh, ki chêh tá hiâm mơno vâ, tuăn rơkê, khên tơnôu  hlối mơhno ki vâ hriĕn plĕng, hriĕn pêi cheăng ƀă tuăn tơmiât ‘na tơdroăng kal kí krá rơdêi, tuăn vâ khât ƀă tơdroăng cheăng ƀă hnoăng cheăng pơlê pơla, ƀă tơdroăng pâ dêi pơlê xiâm, tơnêi têa dêi mâu ngế chêh hlá tơbeăng.

Tối tơbleăng a rôh leh, Ngế pro xiâm hnê ngăn tơnêi têa Phạm Minh Chính rơkâu mâu ngế, khu pú hên hiăng veăng chêh ƀă châ kâ Pri hơnăm kố. Ƀă troăng rơhlâ “xo ki lĕm tah ki ‘mêi’’, “xo ki kơhnâ ki lĕm tah lôi ki klâi alâ ki ‘mêi”, Ngế pro xiâm hnê ngăn pơkâ thế rêm râ ủy Đảng, khu tơrŭm cheăng Đảng tơkŭm hnê mơhno, pro tơ’lêi hlâu ăm mâu kơ koan chêh hlá tơbeăng, mâu ngế chêh hlá tơbeăng tơkŭm hnê, chêh mâu tơdroăng ki pơxúa tung tơpui kâ, troăng rơhlâ   hơ’lêh nếo dêi Đảng ƀă pơkâ mơjiâng Đảng krúa lĕm, rơdêi. Mơdêk tâ kơ mê nếo mâu ƀai chêh ‘na mâu ngế rơkê, mơngế djâ troăng lĕm pêi tơdroăng ki lĕm, mâu ngế kơhnâ rơkê.