Kơxo lơ 10/4, pôa Phạm Minh Chính - Ngế pro xiâm hnê ngăn tơnêi têa hiăng pơkuâ po Rôh hôp Chin phuh ‘na tơdroăng mơjiâng luât khế 4. Rôh hôp kố cho vâ séa ngăn, ăm rơkong tơpui tối ‘na tơdroăng ki xo rơkong tơpui tối dêi kuăn pơlê ƀă pêi pro klêi tơdroăng tơkêa Luât tơnêi tơníu ki ‘mâi pơ’lêh pơtroh ăm Kuô̆k hô̆i ƀă tơdroăng ki tơmâng ngăn rơkong tơpui tối dêi Vi ƀan pơkuâ Kuô̆k hô̆i ƀă kơxop hlá mơ-éa Luât Hngêi ối ki ‘mâi pơ’lêh.

Tơpui pơxiâm po rôh hôp, pôa Phạm Minh Chính, Ngế pro xiâm hnê ngăn Chin phuh ăm ‘nâi: Rêm khế Chin phuh ai 1 rôh hôp ‘na tơdroăng mơjiâng luât, tung pơla ki khât xuân hlo ôh tá tơniăn xơpá vâ ‘nâi hdrối. Xua mê, Chin phuh séa ngăn tung tơdroăng ki ai khât, loi nhuô̆m tung tơdroăng ki ai khât, hlo sap ing tơdroăng ki ai khât, xo tơdroăng ki ai khât pro tơdroăng ki vê vâ mơjiâng luât.

Tung pơla hdrối nah, khu xiâm, kơvâ cheăng hiăng hbrâ rơnáu séa ngăn mâu hlá mơ-éa luât, châ hlo mâu tơdroăng ki tơvâ tơvân, tung tơdroăng ki ‘mâi rơnêu, mơjiâng, pêi klêi luât vâ pro tơ’lêi ăm tơdroăng mơnhông. Kuô̆k hô̆i hiăng rơtế ƀă Chin phuh vâ tŏng kum mâu tơdroăng xơpá, tơvâ tơvân tung pêi pro hnoăng cheăng kal kí, malối cho mâu tơdroăng ki tơvâ tơvân tơdjâk troh kuăn pơlê, khu mơdró kâ, tung tơdroăng ki rak vế tơniăn hnoăng, pơxúa luât tơtro dêi kuăn pơlê, khu mơdró kâ.