A kơxê lơ 3/4, Rôh hôp ‘no tơdrêng ing troăng hyôh internet Chin phuh ƀă kong pơlê tơpui ‘na hlá Tối tơbleăng mơnhên tối ‘mot tơ’nôm klêi kơ’nâi pêi pro túa pơkâ mơ’no liăn cheăng tơdjuôm hơnăm 2022, tơdroăng tối tơbleăng túa pơkâ mơ’no liăn cheăng tơdjuôm hơnăm 2023; Hlá mơ-éa tối tơbleăng mơnhên tối khât ‘mot tơ’nôm klêi kơ’nâi pêi pro túa pơkâ mơnhông mơdêk cheăng kâ rêh ối hơnăm 2022; tơdroăng tối tơbleăng túa pơkâ mơnhông mơdêk cheăng kâ rêh ối hơnăm 2023; Tối tơbleăng mơnhên tối khât ‘mot tơ’nôm klêi kơ’nâi pêi pro liăn ngân tơnêi têa hơnăm 2022, tơdroăng tơbleăng pêi pro kơxô̆ liăn tơnêi têa hơnăm 2023.

A rôh hôp, mâu kăn hiăng môi tuăn ƀă Hlá mơéa tối tơbleăng vâ pơtroh ăm Kuô̆k hô̆i séa ngăn.Laga, kal ‘mot tơ’nôm, pêi pro nhên mâu tơdroăng ki xiâm, malối cho tơpui tối leăng tơdroăng lâp plâi tơnêi tơdjâk troh Việt Nam, mâu tơdroăng xơpá, tá hâi pêi pro klêi tung tơnêi têa dêi tơdroăng cheăng kâ; mâu tơdroăng tơvâ tơvân kal châ tŏng kum vâ mơdêk mơ’no liăn pei cheăng tơdjuôm, pêi pro liăn ngân Tơnêi têa ƀă mơnhông mơdêk cheăng kâ rêh ối pơlê pơla.

Mơgêi rôh hôp a rôh kơxê, pôa Phạm Minh Chính, Ngế pro xiâm hnê ngăn Chin phuh mơhno nhên, tá hâi hơ’lêh tơdroăng pơkâ mơdêk hơnăm 2023 ƀă tơdroăng pơlâ hbrâ mơdât pro mơhrê. Laga, mâu khu xiâm, kơvâ cheăng kal mơ-eăm hen tâ nếo vâ pêi pro châ pơkâ, tơdrêng amê hlói séa ngăn, ‘nâi nhên tơdroăng, ai hlá mơéa, troăng hơlâ tơtrâ teăm tơdrêng.