Ngế pro xiâm hnê ngăn tơnêi têa mơnhên tối khât tơdroăng ki pêi pro tơƀrê tung lâp plâi tơnêi dêi PowerChina, tung mê, ai hên tơdroăng tơkêa pêi pro tơƀrê a Việt Nam. Ngế pro xiâm hnê ngăn tơnêi têa tối nhên tơrŭm cheăng tơrŭm tơroâ, kong têa tơrŭm cheăng tung la ngiâ tŭm têk Việt Nam – Sinuâ dế pro tơ’lêi hlâu vâ khu mơdró kâ péa tơnêi têa thăm mơnhông tơrŭm cheăng ai pơxúa, rơtế châ tơƀrê.

Ngế pro xiâm hnê ngăn tơnêi têa púi vâ PowerChina pơtối ‘no liăn cheăng tung mâu kơvâ cheăng môi tiah on tơhrik krúa, hngêi trăng troăng klông tung la ngiâ, malối cho troăng rơxế lơ treng kơphô̆, kơjo ăm troăng kal xiâm Hải Phòng – Hà Nội – Lào Cai. Pôa Châu Gia Nghĩa, kăn hnê ngăn ăm ‘nâi PowerChina hiăng pro lối 2.000 km troăng rơxế lơ treng tung lâp plâi tơnêi, hiăng rơkê plĕng tung tơdroăng ki pro lối 100 tơdroăng tơkêa a Việt Nam, hbrâ rơnáu tơrŭm cheăng ƀă pŭn khu mơdró kâ Việt Nam vâ tơbleăng pro mâu troăng rơxế lơ treng ki kal.