Hâi lơ 5/8, a Hà Nội, pôa Phạm Minh Chính, Ngế pro xiâm hnê ngăn tơnêi têa veăng Hneăng hôp kăn teăng ma Đảng ƀô̆ Khu xiâm mơjiâng tơmeăm roh má môi, hneăng hơnăm 2025 – 2030. Ƀă troăng pêi ‘’Tơrŭm môi tuăn – Kuăn pơlê pơkuâ dêi hnoăng cheăng – Tơdroăng pơkâ thế rak vế- Châ tơƀrê hluâ pơkâ – Mơnhông mơdêk’’, Đảng ƀô̆ Khu xiâm mơjiâng tơmeăm hneăng hơnăm 2025 – 2030 mơnhên 6 hnoăng cheăng ki xiâm; 3 tơdroăng ki châ tơƀrê hluâ ton xŏn mơnhông tung mơnhông pro hngêi trăng troăng klông, tíu kơdrâm kuăn pơlê rêh ối kơdrâm ƀă hngêi ối pơlê pơla: Kêi đeăng pơkâ troh hơnăm 2030 lâp tơnêi têa ai 5.000 km troăng kân ăm phêp rơxế kơtâu têi; Hriăn plĕng tơdjêp tơdâng tơ’mô tơdroăng pơto tơmeăm, ki rơhêng vâ tối cho mâu kơno têa kơxĭ, kơno tuk tung tơnêi têa ƀă troăng rơxế lơtreng, troăng prôk chêng; Mơdêk kêi đeăng tâi tâng pơkâ 1 rơtuh toăng hngêi ối pơlê pơla troh hơnăm 2030 tiô Tơdroăng tơkêa bro Chin phuh...

Xông tơpui a Hneăng hôp, pôa Phạm Minh Chính, Ngế pro xiâm hnê ngăn tơnêi têa mơnhên hôm khât ƀă kheăn kơdeăn tơdroăng mơ-eăm kân ƀă 9 khu tơdroăng châ tơƀrê ki Đảng ƀô̆ Khu xiâm mơjiâng tơmeăm châ tung hneăng hiăng hluâ.

Tối mâu túa hriâm rơkê tơtro, Ngế pro xiâm hnê ngăn tơnêi têa tối rơdêi ƀai hriâm ‘na tơrŭm môi tuăn, pêi pro troăng hơlâ ƀeăn ƀĕng ƀă tơdroăng nôkố ƀă thăm xing xoăng râ, xing xoăng hnoăng, prôk ƀă tơdroăng séa ngăn. Ngế pro xiâm hnê ngăn tơnêi têa pơkâ thế a ngiâ mơ’nui hơnăm 2025, thế kêi đeăng 3.000 km troăng kân ăm phêp rơxế kơtâu têi; mơ-eăm kêi đeăng troăng têa kơxĭ tiô pơkâ pêi. Ngế pro xiâm hnê ngăn tơnêi têa xuân pơkâ thế nhuô̆m hnê kŏng ngê̆, mơngế pêi cheăng pro troăng rơxế lơtreng ƀă troăng rơxế lơtrêng ki kơtâu têi. Mơdêk tơdroăng pêi pro, mơdêk ki dâi lĕm tíu kơdrâm tíu kuăn pơlê mơjiâng pro; mơjiâng hngêi trăng troăng klông tiô troăng rơxông nếo, tíu kơdrâm kuăn pơlê rêh ối krúa lĕm, rơkê, kâi trâng ƀă kong prâi hơ’lêh...