Lối 1 khế klêi kơ’nâi po Festival reăng Đà Lạt rôh má 9 hơnăm 2022, kơxô̆ tơmối troh a pơlê kong kơdrâm kố rế hía rế hên. A pơlê reăng Đa Thiện, môi tung 5 pơlê reăng ki ton dêi pơlê kong kơdrâm Đà Lạt, tơmối ôm hyô châ mot ngăn dêi ki mơđah tơbleăng hên túa reăng gok gâ mơngiơk, rơtế ƀă kuăn pơlê ki pêt, rak ngăn reăng. Ngoh Trần Thanh Trà, nhŏng o lo ing Pơlê kong kân Hồ Chí Minh, tối ‘na tơdroăng ki châ mot ngăn hơniâp kố dêi tơná.

“Hlo ai môi tíu ki lĕm ó khât, cho a pơlê kong kơdrâm ‘na tơdroăng ki hâk vâ ƀă cho pơlê kong kơdrâm ki ai hên hdrê, lối  rơpâu hdrê reăng. Chiâng vâ tối tiah kố, rêm hdrê reăng cho môi túa ki xú lĕm phá krê xêh, rêm mơngiơk, môi tơdroăng ki lĕm khât ƀă hên ki ê ƀă tâi tâng pơrá hlo tơ-eăng, mơngiơk lĕm ƀă tơpo ro mơnâ mâ khât”.

Rơtế ƀă pơlê reăng Đa Thiện, mâu pơlê reăng Xuân Thành, Vạn Thành, Thái Phiên, Hà Đông dêi Pơlê kong kơdrâm Đà Lạt xuân hiăng tơbleăng tê hên mâu reăng ki dâi lĕm, bê tŭm vâ tê ăm tơmối. Pôa Vũ Anh Dũng, a pơlê reăng Hà Đông, bêng 8, Pơlê kong kơdrâm Đà Lạt, ăm ‘nâi, vâi krâ nhŏng o kơpong kơphô̆ hiăng rơnêu troăng prôk, rơnêu mâu tíu ki hyô ƀă mâu kơdrum reăng ki lĕm:

“Pơlê pêi hnoăng cheăng ngin hiăng tơkŭm po mâu tíu ôm hyô ăm tơmối troh hyô ngăn. Drêng ai tơmối troh mê ngin ai ngế ki djâ lăm troh rêm tíu tung kơdrum tiô pâ thế dêi nhŏng o ki lo lăm ngăn. Tơkéa vâ tối cho tơmối rơhêng vâ lăm ngăn a kơdrum reăng cúc mê ngin djâ troh a kơdrum reăng cúc, mâu kơdrum reăng ly, reăng rô sa mê xuân pơrá ai ngế ki djâ ƀă mơhno tá hiâm mơno ăm tơmối vâ ngăn, tiô hiâm mơno vâi pói rơhêng vâ. Chiâng vâ tối tiah kố, hiâm mơno dêi kuăn pơlê phiu ro khât drêng tơkŭm po mâu tíu ôm hyô a pơlê reăng môi tiah kố”.

Drêng troh a mâu pơlê reăng, tơmối châ mơnúa ngăn môi hâi pro kuăn pơlê ki pêi chiâk, thăm tí tăng ‘nâi túa ki pêi pêt, rak ngăn mâu kơchâi, plâi, pôm ki xiâm dêi Đà Lạt, tơná pin krí dêi xêh yâu ƀok ki hiăng tum, châ hrik xo hyôh kong prâi ki lĕm tung rêh ối dêi mơngế Đà Lạt.

Pakĭng mâu kơdrum xua pơlê reăng tơkŭm po, tíu kố ối ai hên tíu ôm hyô ngăn ‘na pêi chiâk deăng dêi mâu kŏng ti, khu mơdró kâ ôm hyô ki ai tíu pêi cheăng a pơlê kong kơdrâm. Tiô pôa Nguyễn Hùng Vỹ, a pơlê reăng Vạn Thành, tơdroăng ki ăm mâu pơlê reăng tiah hmâ, mâu tíu ôm hyô pêi chiâk ăm tơmối lăm ngăn hiăng po môi tơdroăng cheăng tung la ngiâ ki bâ eăng, pói tơngah thăm rế tơƀrê  ăm kuăn pơlê a pơlê kong kơdrâm. Xua mâu kế tơmeăm ki dâi lĕm dêi kuăn pơlê pêi chiâk deăng pêi lo kô châ hên ngế tí tăng hriăn ‘nâi ƀă ‘nâi klê, sap ing mê mơdêk inâi, ki kơnía git dêi kế tơmeăm pêi lo ing chiâk deăng ƀă pro pơxúa pêi lo liăn ngân hên tâ.

Pakĭng mê, hên tơmối mot hyô ngăn xuân djâ tơvế hên tơdroăng ôm hyô ki ê vâ thăm pơtối mơnhông mơdêk. Pôa Nguyễn Hùng Vỹ, tối:

“Tơdroăng ôm hyô ngăn ‘na chiâk deăng a pơlê reăng Vạn Thành mê dế châ mơnhông tro, pro pơxúa tơƀrê, pêi lo liăn ngân hên. Pơlê kong kơdrâm xuân dế mơhnhôk, pro tơ’lêi hlâu khât ăm kuăn pơlê pêt reăng xuân môi tiah mâu khu mơdró kâ a pơlê kong kơdrâm mơnhông tiô troăng ôm hyô ngăn a mâu ƀăng chiâk deăng. Rế tơrŭm ôm hyô rế mơjiâng pro kế tơmeăm, tơdroăng kố á hlo tơƀrê khât”.

Tiô pôa Tôn Thiện San, Kăn hnê ngăn Vi ƀan pơlê kong kơdrâm Đà Lạt, tung rôh po Festival reăng Đà Lạt rôh má 9 ƀă Têt Lo hơnăm nếo kố, pơlê kong kơdrâm tơkŭm po tơdroăng “Đà Lạt – Ôm hyô mâu pơlê reăng”, vâ tơbleăng, mơđah tơdroăng ton nah mơjiâng, ki lĕm kơpong tơnêi, kuăn mơngế dêi mâu pơlê reăng ton nah troh ƀă tơmối ôm hyô. Kố xuân cho rôh vâ mơhnhôk mâu khu mơdró kâ, kuăn pơlê a mâu pơlê reăng pơtối mơdêk tơ’noăng pêt, ‘no liăn mơnhông pêi chiâk deăng tơtro ƀă mơnhông tê mơdró, ôm hyô.

Pôa Tôn Thiện San, ăm ‘nâi, ‘na ton xŏn, pơlê kong kơdrâm kô pơkâ mơnhông tơtro túa ôm hyô kố vâ mơdêk tơƀrê cheăng kâ pơlê pơla:

“Mâu pơlê reăng pêi cheăng bu cho rôh ki pơxiâm, ngin dế pêi pro túa pơkâ mâu pơlê reăng, drêng túa pơkâ châ kĭ mê kô vêh mơjiâng mâu pơlê reăng ăm tơtro tâ. Ngin kô mơjiâng mâu túa pơkâ kố ngăn tiô kơ pơlê reăng kô ai mâu kế tơmeăm ki nhên vâ mơnhông ki pơxúa dêi pơlê reăng mê. Ki hdrối tâ, mâu pơlê reăng xuân ai kế tơmeăm, môi tiah pơlê reăng Vạn Thành nôkố ai hên tơmối ƀă chiâng vâ lăm hyô ngăn a kơmăng.

Pakĭng mâu khu mơdró kâ hiăng ‘no liăn cheăng, mê pơlê kong kơdrâm kô tŏng ‘na tơbleăng, liăn ngân vâ krâ tơ’nôm mâu pul on bâ eăng chiâng mâu troăng reăng vâ lăm hyô ngăn a kơmăng”.

Ƀă mâu tơdroăng tơmiât tung hnoăng cheăng pơkâ, tơdrêng amê hlối mơdêk xúa khoa hok kih thuât tung pêi chiâk deăng, loi tơngah mâu pơlê reăng tiô khôi hmâ dêi pơlê kong kơdrâm Đà Lạt kô pơtối mơnhông rơdêi ƀă krá ton, bro lĕm tơ’nôm ăm pơlê ai lôí rơpâu hdrê reăng.