Tơbleăng a rôh leh, Kăn hnê ngăn Đảng ủy, Kăn teăng mâ ki pơkuâ tơnêi têa Kŏng hòa xah hô̆i chuh ngiah Việt Nam a kong têa Kul Nguyễn Huy Tăng ăm ‘nâi, drêng troh tơbâ 94 hơnăm hâi mơjiâng Đảng lơ 3/2, pin rơtế ƀă dêi rơpó chôu nhang a veăng xối  tơbâ kơ Pôa Hồ, vâ tơbleăng ăm Pôa ‘nâi mau tơdroăng cheăng ki Đảng ƀô̆ a Kul hiăng chiâng pêi pro tung hơnăm 2023. 

Hơnăm 2023, tơrŭm cheăng péa tơnêi têa Việt Nam - Kul pơtối mơnhông trâu rơdâ ƀă châ pêi hên tơdroăng tung hên kơvâ cheăng ‘na kal kí, tơpui kâ, ‘na lêng, kring tơniăn rế tơƀrê, pơxúa tâ; tơrŭm cheăng kâ, tê mơdró ‘no liăn cheăng pơ’lêh rơdêi, veăng ‘no hnoăng mơdêk dêi péa tơnêi têa.

Tung chôu phut nhoăm pâ, mâu kăn hiăng koh chôu nhang a veăng xối kơ Kăn xiâm hnê ngăn tơnêi têa Hồ Chí Minh, ngế kăn ki rơkê dêi hdroâng mơngế vâ tơbâ hnoăng ki kân, pâ rơkong pôa hnê ăm mâu rơxông pin hâi kố ƀă xo ah hmôi.