Rơpŏng pôa Hồ Văn Thiếp, ối a thôn Tru – Chaih, cheăm Đông Sơn, tơring A Lưới, kong pơlê Thừa Thiên Huế ối tung rơpŏng kơtiê to lâi hơnăm kố. Rơpŏng ôh tá ai tơnêi ngo ngối vâ pêt mơjiâng tơmeăm, on veăng lăm ngoh lăm pêi cheăng vâi, lăm tăng liăn kơnôm ing lăm pêi cheăng vâi. Nếo achê kố, Đông mô đô̆i gâk tơkăng kong tíu tê mơdró ngi kong têa ê A Đớt tŏng kum pôa môi to ro hdrê ƀă hnê mơhno troăng pêi cheăng kâ.

Pôa Hồ Văn Thiếp ƀă hên rơpŏng a kố mơnê hên ‘nâng tơdroăng tŏng kum dêi mâu tăm mô đô̆i gâk tơkăng kong:

‘’Mơnê hên ‘nâng Đông mô đô̆i gâk tơkăng kong hiăng tŏng kum ăm vâi krâ kuăn pơlê kơtiê cho hên. Pói tơngah á păn, á rak ngăn lĕm, vâ rơpŏng tơkâ hluâ pá puât’’.

Nếo achê kố, Khu xiâm pơkuâ Mô đô̆i gâk tơkăng kong kong pơlê Thừa Thiên Huế tơrŭm ƀă Khu pơkuâ vâi kơdrâi kong pơlê pơxiâm mơjiâng pro  ‘’hngêi tuăn pâ tơkăng kong’’ diâp rơpŏng kơtiê tơkăng kong. 4 rơpŏng kơtiê a mâu cheăm Đông Sơn, Lâm Đớt, A Roàng ƀă Hương Nguyên dêi tơring A Lưới châ tŏng kum rêm rơpŏng 60 rơtuh liăn vâ mơjiâng pro hngêi. Kăn ƀô̆, mô đô̆i gâk tơkăng kong pro đông tung tơring kum vâi krâ kuăn pơlê mơjiâng hngêi ối, rĕng tơniăn tơdroăng rêh ối.  

Nâ Huỳnh Thị Bé, ối a thôn Chi Lanh – A Roh, cheăm Lâm Đớt, tơring A Lưới tối, Mô đô̆i gâk tơkăng kong đi đo tŏng kum vâi krâ kuăn pơlê, môi tiah mơjiâng hngêi ối, kum ro, kuăn chu, kum vâi krâ kuăn pơlê mơnhông cheăng kâ, xăm kơklêa kơdroh kơtiê, pơ’lêh tơdroăng rêh ối:

‘’Đông mô đô̆i gâk tơkăng kong pro tơ’lêi hlâu ăm kuăn pơlê. Mâu ngoh tŏng kum ăm hên kuăn pơlê, môi tiah pro mâu tơmeăm ăm rơpŏng kơtiê, tŏng kum hdrê ro ăm mâu rơpŏng kơtiê, pro tơ’lêi hlâu ăm kuăn pơlê tơkâ hluâ pá puât. Rêm hơnăm, xuân ai rơpŏng hluăn ing kơtiê’’.

Kơpong tơkăng kong kong pơlê Thừa Thiên Huế ối hên pá puât, tơdroăng cheăng kâ hrá mơnhông mơdêk. Xua mê, Mô đô̆i gâk tơkăng kong Thừa Thiên Huế đi đo rơtế kum kuăn pơlê xăm kơklêa, kơdroh kơtiê. Đăi ŭy Võ Xuân Minh, Cheăng kal kí Đông mô đô̆i gâk tơkăng kong tíu tê mơdró ngi kong têa ê A Đớt, Mô đô̆i gâk tơkăng kong kong pơlê Thừa Thiên Huế tối, đông lêng pơkuâ 3 cheăm Lâm Đớt, Đông Sơn, Hương Phong, tơring A Lưới  ƀa lối 1.890 rơpŏng, tung mê, lối 1.00 rơpŏng kơtiê.

Đông lêng hiăng tơrŭm ƀă Khu pơkuâ kuăn pơlê pêi chiâk deăng, Khu pơkuâ vâi kơdrâi tơring, ‘nâi nhên tơdroăng pá puât dêi rêm rơpŏng, ing mê tŏng kum vâi krâ kuăn pơlê mơnhông mơdêk cheăng kâ:

‘’Nôkố, Đông lêng rak ƀă pêi pro mâu tơdroăng ‘’Kum o troh hngêi trung’’, ‘’Kuăn roăng Mô đô̆i gâk tơkăng kong’’, ‘’Kơthung phái tuăn pâ’’... Đông lêng đi đo tŏng kum 2 rơpŏng, rêm rơpŏng 20 kilô phái/khế, klêi mê mơhnhôk mâu ngế tŏng kum mâu tơdroăng mơjiâng hngêi ối ăm mơngế kơtiê tơkăng kong, hơnăm 2023 mơjiâng 2 toăng hngêi, rêm toăng hngêi 60 rơtuh liăn. Pakĭng mê, Đông mô đô̆i gâk tơkăng kong tŏng kum tơ’nôm ‘na hâi pêi cheăng kum vâi krâ kuăn pơlê mơjiâng pro hngêi’’.

Tung pơla kố nah, khu Mô đô̆i gâk tơkăng kong hiăng tơrŭm ƀă khu râ kăn pơkuâ mâu cheăm pêi pro hên tơdroăng, troăng kum kuăn pơlê, môi tiah: mâu ‘’Tôh pơkuâ xêh troăng tơkăng kong, tơneăn tơkăng kong’’; ‘’Đảng viên Đông mô đô̆i gâk tơkăng kong pơkuâ mâu rơpŏng a kơpong tơkăng kong’’; ‘’kơthung phái tuăn pâ’’; ‘’kum o troh hngêi trung’’; ‘’Rơtế ƀă vâi kơdrâi tơkăng kong’’...

Ing mê, tơdjuôm ivá mơjiâng thôn pơlê nếo ƀă xăm kơklêa kơdroh kơtiê krá tơniăn tung cheăm. Đăi tă Đặng Ngọc Hiệu, Kăn phŏ cheăng kal kí mô đô̆i gâk tơkăng kong kong pơlê Thừa Thiên Huế tối ăm ‘nâi, rêm hơnăm Mô đô̆i gâk tơkăng kong kong pơlê mơjiâng lối 50 toăng hngêi diâp ăm vâi krâ kuăn pơlê kơtiê a kơpong tơkăng kong. Kăn ƀô̆ mâu Đông lêng Mô đô̆i gâk tơkăng kong pêi po tơtro tơdroăng pơtâng tối, mơhnhôk ƀă hnê mơhno vâi krâ pơ’lêh hdrê pêt, mơnăn păn, mơ-eăm xăm kơklêa kơdroh kơtiê krá tơniăn:

‘’Nhŏng o achê ƀă mâu rơpŏng vâ pơtâng tối, mơhnhôk, klêi mê hnê mơhno vâi krâ kuăn pơlê tơdroăng pêi cheăng kâ vâ mơnhông cheăng kâ – rêh ối pơlê pơla. Xuân ing tơdroăng cheăng mê nhŏng o mơhnhôk mê châ hlo ki rơdêi ƀă ivá dêi vâi krâ kuăn pơlê vâ tơkŭm po ăm vâi krâ pêt mơjiâng tơmeăm, tê mơdró, pêi mâu tơdroăng tê mơdró, ki xiâm tui lui cho mơnhông mơdêk cheăng kâ’’.